សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងសមត្ថកិច្ចនៃការិយាល័យប្រយុទ្ធប្រឆាំងគ្រឿងញៀនបានឃាត់ខ្លួនជនសង្ស័យប្រុសស្រី៥នាក់ជាប់ពាក់ព័ន្ធករណីជួញដូរគ្រឿងញៀនដោយខុសច្បាប់ និងធ្វើការដកហូតសារធាតុញៀនមួយចំនួនធំ ហើយត្រូវកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញដើម្បីចាត់ការតាមនីតិវិធី នៅព្រឹកថ្ងៃទី១១ ខែកញ្ញា ឆ្នាំ២០២០ ស្អែកនេះ។
ដោយមានការដឹកនាំ និងចង្អុលបង្ហាញពីលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ និង លោកឧត្តមសេនីយ៍ទោ ហួត ចាន់យ៉ារ៉ាន់ ស្នងការរងទទួលផែនការងារប្រឆាំងគ្រឿងញៀន ដោយមានការសម្របសម្រួលនីតិវិធីពីលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កម្លាំងសមត្ថកិច្ច នៃការិយាល័យប្រយុទ្ធប្រឆាំងគ្រឿងញៀន បានឃាត់ខ្លួនជនសង្ស័យប្រុសស្រី ៥នាក់។
គួររំលឹកផងដែរថា កាលពីវេលាម៉ោង ១៨និង១០នាទីថ្ងៃទី៦ ខែសីហា ឆ្នាំ២០២០ លោកវរសេនីយ៍ទោ រុឹម មុិច នាយការិយាល័យប្រឆាំងគ្រឿងញៀន បានដឹកនាំកម្លាំងចុះប្រតិបត្តិការបង្ក្រាបជាក់ស្តែងករណីជួញដូរគ្រឿងញៀនខុសច្បាប់នៅចំណុចមហាវិថីសហព័ន្ធរុស្ស៊ី សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ឃាត់ខ្លួនជនសង្ស័យម្នាក់ឈ្មោះ កុត សារេង ភេទប្រុស អាយុ៣៦ឆ្នាំ ជនជាតិខ្មែរ មុខរបរជាអ្នករត់តាក់ស៊ី និងដកហូតវត្ថុតាងម្សៅក្រាមសថ្លាសង្ស័យគ្រឿងញៀនចំនួន១កញ្ចប់ធំល្មម រថយន្ដចំនួន១គ្រឿងម៉ាកសាំយ៉ុង ពណ៌លឿង ពាក់ស្លាកលេខ ភ្នំពេញ 2BD-0499 និង ទូរស័ព្ទដៃ២គ្រឿង ។
សូមបញ្ជាក់ផងដែរថា ក្រោយឃាត់ខ្លួនជនសង្ស័យបានម្នាក់ហើយ ដោយអនុវត្ដតាមវិធានការជំនាញ សមត្ថកិច្ចបានទៅបន្ដឃាត់ខ្លួនជនសង្ស័យម្នាក់ទៀត ឈ្មោះ វ៉ន ឯម ភេទប្រុស អាយុ២៩ឆ្នាំ ជនជាតិខ្មែរ មុខរបររើសអេតចាយនៅចំណុចផ្លូវបេតុង សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ដកហូត ម៉ូតូចំនួន១គ្រឿងបន្ថែមទៀត។
លុះមកដល់ថ្ងៃទី៨ ខែកញ្ញា ឆ្នាំ២០២០ នគរបាលបានធ្វើការស្រាវជ្រាវបន្ត ហើយ បានឃាត់ខ្លួនជនសង្ស័យចំនួន២នាក់ទៀតឈ្មោះ ចាន់ សុភ័ក្រ ភេទប្រុស អាយុ៣២ឆ្នាំ ជនជាតិខ្មែរ មុខរបររត់ម៉ូតូឌុប ឃាត់ខ្លួននៅចំណុចហាងកាត់សក់ ផ្ទះលេខE51 ផ្លូវបេតុង ក្រុមទី១ ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ដកហូតម៉ូតូចំនួន១គ្រឿង និងទូរស័ព្ទដៃចំនួន១គ្រឿង។ ជនសង្ស័យទី២ឈ្មោះ ស៊ឹម សេរី ភេទប្រុស អាយុ៣០ឆ្នាំ ជនជាតិខ្មែរ មុខរបរបុគ្គលិកក្រុមហ៊ុនចិន ឃាត់ខ្លួននៅចំណុចមុខហាង ម៉ាស្សាCK ផ្លូវបេតុង ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
រហូតដល់ល្ងាច ថ្ងៃទី៩ ខែកញ្ញា ឆ្នាំ២០២០ នគរបាលបានបន្តស៊ើបអង្កេត ហើយធ្វើការឃាត់ខ្លួនជនសង្ស័យម្នាក់ទៀត ឈ្មោះ ហេង សុខឃីម ភេទស្រី អាយុ ៣៤ឆ្នាំ ជនជាតិខ្មែរ នៅចំណុចក្នុងចម្ការពោត ផ្លូវលំ ភូមិឈើទាល ឃុំឈូក ស្រុកឈូក ខេត្ដកំពត និងធ្វើការដកហូតវត្ថុតាងរួមមាន ម្សៅក្រាមពណ៌សថ្លាសង្ស័យជាគ្រឿងញៀនចំនួន៥ថង់ធំ , រថយន្ដចំនួនមួយគ្រឿងម៉ាកឡិចស៊ីស៤៧០ ពណ៌ខ្មៅ ពាក់ស្លាកលេខ ភ្នំពេញ 2BB-7674 និងបន្ដធ្វើការឆែកឆេរផ្ទះរបស់ជនសង្ស័យឈ្មោះ ហេង សុខឃីម ភេទស្រី អាយុ ៣៤ឆ្នាំ ជនជាតិខ្មែរ ផ្ទះគ្មានលេខ ផ្លូវជាតិលេខ៣ ភូមិយាយឡ ឃុំត្រាំកក់ ស្រុកត្រាំកក់ ខេត្ដតាកែវ ហើយសមត្ថកិច្ចយើងបានធ្វើការដកហូតវត្ថុតាង ម្សៅក្រាមពណ៌សថ្លាសង្ស័យជាគ្រឿងញៀនចំនួន១កូនថង់, ថង់សម្រាប់ច្រកគ្រឿងញៀនមួយចំនួន, វិញ្ញាបនបត្រសម្គាល់អចលនវត្ថុ ចំនួន១០បណ្ណ (ប្លង់ដី)។ ចំពោះទីតាំងផ្ទះគ្មានលេខ ផ្លូវជាតិ លេខ៣ ភូមិយាយឡ ឃុំត្រាំកក់ ស្រុកត្រាំកក់ ខេត្ដតាកែវ លោកព្រះរាជអាជ្ញានៃអយ្យការអមសាលាដំបូងខេត្ដតាកែវ សម្រេចប្រគល់ឲ្យអាជ្ញាធរមូលដ្ឋានជាអ្នកគ្រប់គ្រងបណ្ដោះអាសន្ន៕ ដោយ៖ រ៉ារ៉ា
