សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលអាមេរិក បានអនុញ្ញាតឲ្យក្រុមហ៊ុនIntel របស់អាមេរិកលក់សម្ភារមួយចំនួនឲ្យទៅក្រុមហ៊ុនបច្ចេកវិទ្យា ហួវៃ ។
កាលពីថ្ងៃទី២២ ខែកញ្ញា អ្នកនាំពាក្យក្រុមហ៊ុន Intel បានប្រកាសឲ្យដឹងថា រដ្ឋាភិបាលអាមេរិកបានយល់ព្រមផ្តល់លិខិតអនុញ្ញាតឲ្យក្រុមហ៊ុនលក់សម្ភារចាំបាច់មួយចំនួនដល់ក្រុមហ៊ុនបច្ចេកវិទ្យាហួវៃ។
កាលពីខែឧសភា ឆ្នាំ២០១៩ ក្រុមហ៊ុនហួវៃត្រូវអាមេរិកដាក់ចូលក្នុងបញ្ជីខ្មៅរួមជាមួយក្រុមហ៊ុនចំនួន២៧០ក្រុមហ៊ុនផ្សេងទៀត របស់ចិន។ បណ្តាក្រុមហ៊ុនអាមេរិក ត្រូវហាមប្រាមលក់សម្ភារទៅឲ្យក្រុមហ៊ុនចិននោះទេ បើមិនមានការអនុញ្ញាតនោះ។
នៅពេលនេះក្រុមហ៊ុន Intel បានដាក់លិខិតទៅកាន់រដ្ឋាភិបាលអាមេរិកសុំការអនុញ្ញាតឲ្យលក់សម្ភារមួយចំនួនឲ្យទៅក្រុមហ៊ុន
ហួវៃ។ កាលពីថ្ងៃទី១៥ ខែកញ្ញា ក្រុមហ៊ុន ផលិត ឈីប SMIC (Semiconductor Manufacturing International Corporation) ក៏បានដាក់លិខិតទៅកាន់រដ្ឋាភិបាល សុំការអនុញ្ញាតពីរដ្ឋភិបាលអាមេរិក ។ ជាមួយគ្នានោះក្រុមហ៊ុនផលិតឈីប SK Hynix របស់កូរ៉េខាងត្បូងក៏បានដាក់លខិតទៅកាន់រដ្ឋាភិបាលអាមេរិកដែរ ប៉ុន្តែមិនទទួលបានការអនុញ្ញាតនោះឡើយ។
រយៈពេលកន្លងមកប្រធានាធិបតីអាមេរិកដូណាល់ ត្រាំ មានសកម្មភាពតឹងតែងចំពោះក្រុមហ៊ុនហួវៃ។ លោកត្រាំបានចាត់ទុកក្រុមហ៊ុន ហួវៃ គំរាមកំហែងដល់សន្តិសុខជាតិអាមេរិក ដោយក្រុមហ៊ុនអាចបញ្ជូនព័ត៌មានសម្ងាត់ទៅឲ្យចិន៕ដោយ៖ធី រីណា
