សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យស្រវឹងស្រា បានបេីករថយន្តឡិចសុីសLX470 ចូលតាមផ្លូវបេតុងតូចៗក្បែរវត្តថាន់ ក្នុងសង្កាត់ទន្លេបាសាក់ ខណ្ឌចំការមន បណ្ដាលឲ្យប៉ះឡំប្រឺតា រុឺម៉កលក់ទឹកអំពៅ និងម៉ូតូ៣គ្រឿងបណ្ដាលឲ្យរងការខូចខាត ព្រមទាំងកិនជេីងស្ត្រីម្នាក់ឲ្យរងរបួសធ្ងន់ បង្កការភ្ញាក់ផ្អេីលដល់ប្រជាពលរដ្ឋ និងសមត្ថកិច្ចដេញតាមចាប់រថយន្តបង្ក កាលពីវេលាម៉ោង៩ និង៣០នាទីយប់ថ្ងៃទី២៥ ខែកញ្ញា ឆ្នាំ២០២០ ។
បេីតាមប្រភពព័ត៌មានពីប្រជាពលរដ្ឋដែលនៅកន្លែងកេីតហេតុបានឲ្យដឹងថា មុនពេលកេីតហេតុគេឃេីញបុរសម្នាក់ទំនងជាស្រវឹងស្រាខ្លាំង បានបេីករថយន្តម៉ាក Lexus LX470 ពណ៌ស្ករ ពាក់ស្លាកលេខភ្នំពេញ 2AO-2270 ចូលតាមផ្លូវបេតុងតូចៗនិងចង្អៀតក្បែរវត្តថាន់ ហើយជ្រុលទៅបុកឡំប្រឺតាមួយគ្រឿង រួចបន្តទៅប៉ះរុឺម៉កលក់ទឹកអំពៅ និងកៀររបងផ្ទះប្រជាពលរដ្ឋជាច្រេីនកន្លែងតែមិនព្រមឈប់ក៏ជ្រុលទៅបុកម៉ូតូ៣គ្រឿងជាបន្តបន្ទាប់ទៀតបណ្ដាលឲ្យរងការខូចខាត ជាមួយគ្នានោះក៏ជ្រុលទៅកិនជេីងស្ត្រីម្នាក់ដែលឈរក្បែរផ្លូវបណ្ដាលឲ្យរបួសធ្ងន់ត្រូវបញ្ជូនទៅកាន់មន្ទីរពេទ្យផងដែរ ។
ក្រោយមកទៀត រថយន្តបង្កក៏បានបុកទម្លុះឈេីរន្ទាដែលព្រះសង្ឃរៀបចំដាក់នៅក្រោមខ្លោងទ្វារច្រកចូលវត្តសម្រាប់ឡេីងលាបថ្នាំឲ្យថ្មី រងការខូចខាតហេីយក៏បេីករថយន្តរត់គេច ធ្វេីឲ្យប្រជាពលរដ្ឋដេញតាមរហូតមកទុករថយន្តចោលនៅផ្លូវព្រះនរោត្ដម រួចគេចខ្លួនបាត់ ។
ក្រោយកេីតហេតុ សមត្ថកិច្ចមូលដ្ឋានបានចុះទៅដល់ទីតាំងខាងលេី រួចទាក់ទងសមត្ថកិច្ចជំនាញចរាចរណ៍ឲ្យមកធ្វេីការវាស់វែងយករថយន្តបង្កខាងលេីទៅរក្សាទុកនៅការិយាល័យចរាចរណ៍ជេីងគោក នៃស្នងការដ្ឋាននគរបាលរជធានីភ្នំពេញ ដេីម្បីរង់ចាំម្ចាស់ចូលខ្លួនដោះស្រាយតាមនីតិវិធី ៕ដោយ៖ ភារ៉ា ដង្កោ
