សារព័ត៌មាន នគរវត្ត តែងតែនាំមុខគេជានិច្ច
តាមការវាយតម្លៃជាក់ស្តែងរុស្ស៊ីមិនទទួលបានអ្វីនៅក្នុងទឹកដីស៊ីរី ដូចជា អាមេរិកដែលបានបូមប្រេងស៊ីរីយកទៅលក់នោះទេ។ ប៉ុន្តែអ្វីដែលរុស្ស៊ីទទួលបាននោះគឺការសាកល្បងអាវុធជាច្រើនប្រភេទនៅលើទឹកដីស៊ីរី ។ អាចនិយាយបានថា ទឹកដីស៊ីរី គឺជា«ផ្ទាំងទស្សនីយភាព នៃការផ្សព្វផ្សាយពាណិជ្ជកម្មសព្វាវុធរបស់រុស្ស៊ី និងជាទីតាំងសាកល្បងអាវុធក្នុងសមរភូមិពិត»។
ក្រសួងការពារជាតិរុស្ស៊ី បានឲ្យដឹងថា មុនពេលចាប់ផ្តើមចូលរួមនៅក្នុងសង្គ្រាមក្នុងប្រទេសស៊ីរី គឺបានបង្កើតទីតាំងទាហានអាកាសជាសម្ងាត់នៅលើទឹកដីស៊ីរីរួចមកហើយ ដោយមានយន្តហោះចម្បាំង ៣៤គ្រឿង និងឧទ្ធម្ភាគចក្រ១៦គ្រឿង ។ ក្រៅពីនេះ កម្លាំងទាហានពិសេសរុស្ស៊ីក៏បានប្រមូលផ្តុំគ្នានៅទីនោះដែរ។
រដ្ឋមន្ត្រីក្រសួងការពារជាតិរុស្ស៊ី លោកSergei Shoigu បានឲ្យដឹងថា ដំណាក់កាលទាហានរុស្ស៊ីធ្វើសកម្មភាពខ្លាំងជាងគេក្នុងប្រទេសស៊ីរី គឺមានរយៈពេល ៨០៤ថ្ងៃ ចាប់ពីថ្ងៃទី៣០ខែកញ្ញាឆ្នាំ២០១៥ ដល់ថ្ងៃទី១១ ខែធ្នូ ឆ្នាំ២០១៧។ សរុបកម្លាំងទាហានអាកាសរុស្ស៊ី បានចេញប្រតិបត្តិការដល់ទៅ ៤៤០០០ លើក ហើយការវាយប្រហារទម្លាក់គ្រាប់បែកទៅលើទីតាំងក្រុមភេរវកម្ម IS ច្រើនបំផុតគឺ១៣៩លើកក្នុងមួយថ្ងៃនៅថ្ងៃទី២០ ខែវិច្ឆិកា ឆ្នាំ២០១៥។
ចំណែកយន្តហោះទម្លាក់គ្រាប់ បែកTu-22M3 បានហោះហើរទម្លាក់គ្រាប់បែក ៤៧លើកទៅលើទីតាំងក្រុមភេរវកម្ម ។ កាំជ្រួចមីស៊ីលរយៈចម្ងាយឆ្ងាយ Kalibr និង Kh-101 ក៏ត្រូវបានប្រើប្រាស់នៅក្នុងការវាយប្រហារគោលដៅសំខាន់បំផុតរបស់ក្រុមភេរវកម្មដែរ។
តាមការលើកឡើងរបស់រដ្ឋមន្ត្រីក្រសួងការពារជាតិរុស្ស៊ីបានឲ្យដឹងថា អ្វីដែលរុស្ស៊ីទទួលបាននៅក្នុងសង្គ្រាមនៅប្រទេសស៊ីរីនោះគឺ ទីមួយ ទាហានរុស្ស៊ីទទួលបានបទពិសោធន៍ពិតក្នុងសមរភូមិខ្ពស់ ពិសេសគឺការបង្កើតគម្រោង វាយប្រហារ និងសហការគ្នាយ៉ាងល្អ ប្រសើរ។
ទីពីរ គឺទីបញ្ជាការកម្លាំងទាហានទាំងអស់ទាំងកម្លាំងការពារដែនអាកាស ទាហានអាកាស ទីបញ្ជាការកងពល ក្រុមអាកាសយានិកបានបង្កើតកិច្ចសហប្រតិបត្តិការគ្នាយ៉ាងល្អបំផុត។ ជាមួយគ្នានោះ ផលប្រយោជន៍យ៉ាងសំខាន់ដែលរុស្ស៊ីទទួលបានគឺ ការសាកល្បងសព្វាវុធពិតប្រាកដនៅទីនោះ ជួយឲ្យរុស្ស៊ីរកបានទីផ្សារអាវុធកាន់តែច្រើន៕ដោយ៖ធី រីណា
