សារព័ត៌មាន នគរវត្ត តែងតែនាំមុខគេជានិច្ច
ខ្សែការពារ Phil Foden របស់ក្រុម Manchester City ត្រូវបានគ្រូបង្វឹកជម្រើសជាតិអង់គ្លេសហៅឲ្យចូលប្រកួតវិញនាពាក់កណ្តាលខែវិច្ឆិកាខាងមុខ ដោយប្រកួតជាមួយសាធារណរដ្ឋអៀរឡង់, បែលហ្ស៊ិក និងអ៊ីស្លង់។
ជាមួយគ្នានោះមិនមានកន្លែងសម្រាប់ខ្សែប្រយុទ្ធ Mason Greenwood ទេដែលនៅជាមួយ Foden ត្រូវបានលុបចោលពីក្រុមកាលពីខែមុនបន្ទាប់ពីត្រូវបានបញ្ជូនចេញពីទឹកដីអ៊ីស្លង់កាលពីខែកញ្ញាពីបទរំលោភគោលការណ៍ណែនាំនៃការឆ្លងជំងឺកូវីដ-១៩។ រីឯខ្សែប្រយុទ្ធ Danny Ingsនិងខ្សែបម្រើ Kalvin Phillips ខកខានចូលជម្រើសជាតិដែរដោយសាររបួស។ ចំណែកខ្សែការពារក្រុមតោខៀវ Chelsea កីឡាករ Reece James នឹងមានឈ្មោះសម្រាប់ការប្រកួតមិត្តភាពជាមួយសាធារណរដ្ឋអៀរឡង់នៅថ្ងៃទី១២ ខែវិច្ឆិកាមុនពេលជាប់បម្រាម២ប្រកួត។
ប្រធានក្រុមបិសាចក្រហម Manchester United កីឡាករ Harry Maguire នឹងមិនមានវត្តមានសម្រាប់ការប្រកួតកម្មវិធី Nations League នៅក្រៅទឹកដីទល់នឹងបែលហ្ស៊ិកនៅថ្ងៃទី១៥ ខែវិច្ឆិកាឡើយ បន្ទាប់ពីត្រូវបានបណ្តេញចេញពីក្រុម ។
មិត្តរួមក្លិបរបស់ Foden គឺខ្សែបម្រើប្រយុទ្ធ Raheem Sterling ក៏ត្រូវបានគេរំពឹងទុកជាប់ជាជម្រើស១១នាក់ផងដែរ បន្ទាប់ពីខកខានការប្រកួតអន្តរជាតិចុងក្រោយ ដោយសារបញ្ហារបួសសរសៃពួរតិចតួច។
គួរបញ្ជាក់ថា ក្រុមជម្រើសជាតិអង់គ្លេសនឹងប្រកួតជាមួយក្រុមភ្ញៀវសាធារណរដ្ឋអៀរឡង់កម្មវិធីមិត្តភាពអន្តរជាតិនៅថ្ងៃទី១២ ខែវិច្ឆិកាបន្ទាប់មកក៏ត្រូវប៉ះក្រុមម្ចាស់ផ្ទះបែលហ្ស៊ិកនៅថ្ងៃទី១៦ ធ្វើជាម្ចាស់ផ្ទះទទួលស្វាគមន៍ក្រុមជម្រើសជាតិអ៊ីស្លង់នៅកម្មវិធី Nations League នាថ្ងៃទី១៩ ខែវិច្ឆិកា ៕
ដោយ៖ភារៈ
