សារព័ត៌មាន នគរវត្ត តែងតែនាំមុខគេជានិច្ច
នៅលើបណ្តាញសង្គមហ្វេសប៊ុក អនុប្រធានាធិបតីអាហ្វហ្គានីស្ថាន បានប្រកាសឲ្យដឹងថា ការវាយប្រហារបង្ហូរឈាមនៅមហាវិទ្យាល័យទីក្រុងកាប៊ុល បង្កឡើងដោយខ្មាន់កាំភ្លើង មានឈ្មោះAdil។ ខ្មាន់កាំភ្លើងរូបនេះត្រូវបានក្រុមភេរវកម្មHaqqaniជ្រើសរើសឱ្យ ឡើងគម្រោងវាយប្រហារនៅថ្ងៃទី២ខែវិច្ឆិកាឆ្នាំ២០២០។
នៅថ្ងៃទី១៤ខែវិច្ឆិកា អនុប្រធានាធិបតីអាហ្វហ្គានីស្ថាន លោក Amrullah Saleh បានបញ្ជាក់ថា មេខ្លោងនៅពីក្រោយការវាយប្រហារនៅមហាវិទ្យាល័យទីក្រុងកាប៊ុលសម្លាប់មនុស្សរាប់សិបនាក់ កាលពីដើមខែវិច្ឆិកាគឺជាបណ្តាញភេរវកម្ម Haqqani ជាសាខារបស់ក្រុមតាលីបង់ ។ ក្នុងពេលសួរចម្លើយ ខ្មាន់កាំភ្លើងAdil បានបញ្ជាក់ថា ខ្លួនបានទទួលអាវុធពីបណ្តាញភេរវកម្ម Haqqani ។ ការវាយប្រហារគឺដើម្បីដាក់គំនាប និងធ្វើឲ្យបាត់បង់កិត្តិយសរបស់រដ្ឋាភិបាល។
អនុប្រធានាធិបតីអាហ្វហ្គានីស្ថានបញ្ជាក់ទៀតថា ខ្មាន់កាំភ្លើងដែលបាញ់ប្រហារនោះមកពីខេត្តPanjshir ហើយបានទៅរស់នៅជាយក្រុងកាប៊ុល។ ខ្មាន់កាំភ្លើងរូបនេះធ្លាប់បានបាត់ខ្លួន៣ឆ្នាំ ដោយមានព័ត៌មានថាទៅហ្វឹកហាត់ប្រយុទ្ធ ។
ការបាញ់ប្រហារនៅថ្ងៃទី២ ខែវិច្ឆិកាមានខ្មាន់កាំភ្លើង៣នាក់បានសម្រុកចូលមហាវិទ្យាល័យកាប៊ុល បាញ់ប្រហារនៅក្នុងថ្នាក់រៀនបណ្តាលឲ្យមនុស្ស២២នាក់ស្លាប់ និង២៧នាក់រងរបួស ខ្មាន់កាំភ្លើងទាំង៣នាក់ស្លាប់ពេលប៉ះទង្គិចជាមួយសន្តិសុខ៕
ដោយ៖ធី រីណា
