សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកឡិចសុីសស៊េរីទំនើបមួយគ្រឿងបោះពួយយ៉ាងលឿនជ្រុលទៅបុករថយន្តស៊េរីទំនើបម៉ាកអូឌីពីក្រោយពេញទំហឹងបណ្តាលធ្វើឲ្យរថយន្តទាំង២គ្រឿងរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៧និង៣០នាទីយប់ថ្ងៃទី ១៤ ខែធ្នូឆ្នាំ ២០២០នៅតាមបណ្ដោយផ្លូវណតប្រ៊ីត ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឲ្យដឹងថាមុនពេលកើតហេតុគេឃើញរថយន្ត មួយគ្រឿងម៉ាកអូឌីពណ៌ស ពាក់ស្លាកលេខ ភ្នំពេញ 2AF-7389 បើកបរដោយបុរសម្នាក់មិនស្គាល់អត្តសញ្ញាណធ្វើដំណើរទិសដៅពីជើងទៅត្បូងលុះដល់ចំណុចកើតហេតុស្រាប់តែមានរថយន្តស៊េរីទំនើបមួយគ្រឿងម៉ាកឡិចសុីសNX 300 ពណ៌សពាក់ស្លាកលេខភ្នំពេញ2BH-7627 បើកបរដោយបុរសម្នាក់មិនស្គាល់អត្តសញ្ញាណធ្វើដំណើរទិសដៅពីជើងទៅត្បូងក្នុងល្បឿនលឿនលុះមកដល់ចំណុចកើតហេតុខាងលើរថយន្តឡិចស៊ីសចាប់ហ្វ្រ័ងមិនទាន់ក៏ជ្រុលទៅបុករថយន្តម៉ាកអូឌីចំផ្នែកខាងក្រោយពេញទំហឹងបណ្ដាលឲ្យរថយន្តឡិចសុីសរងការខូចខាតផ្នែកខាងមុខយ៉ាងដំណំចំណែករថយន្តម៉ាកអូឌីរងការខូចខាតផ្នែកខាងក្រោយបន្តិចបន្តួច តែសំណាងល្អមិនបណ្តាលឲ្យមានអ្នករងរបួសនោះទេ។
ក្រោយកើតហេតុសមត្ថកិច្ចមូលដ្ឋានចុះទៅដល់ទីតាំងកន្លែងកើតហេតុដោយពិនិត្យមើលស្ថានភាពមិនប៉ះពាល់របស់រដ្ឋទើបឲ្យភាគីទាំងសងខាងធ្វើការចរចាគ្នាបានមួយសន្ទុះក្រោយមកភាគីខាងរថយន្តឡិចស៊ីសព្រមចេញថ្លៃជួសជុលឲ្យទៅរថយន្តម៉ាកអូឌីដើម្បីបញ្ចប់រឿងនៅកន្លែងកើតហេតុ ៕
ដោយ៖និន សុភ័ស្ត
