សារព័ត៌មាន នគរវត្ត តែងតែនាំមុខគេជានិច្ច
រដ្ឋមន្ត្រីការបរទេសអាមេរិក លោក Pompeo នឹងជួបជាមួយលោកបៃឌិន នៅថ្ងៃទី១៧ខែធ្នូ ដើម្បីពីភាក្សា គ្នាលើបញ្ហាសំខាន់ៗ ពិសេសគឺការផ្ទេរអំណាច។
តាមសារព័ត៌មាន AP និង CNN បានផ្សាយថា រដ្ឋមន្ត្រីការបរទេសអាមេរិក លោក Mike Pompeo បានបន្ទន់ឥរិយាបថ ដោយព្រមជួបជាមួយក្រុមការងារផ្ទេរអំណាចរបស់លោកបៃឌិន គឺលោក Antony Blinken ស្តីពីដំណើរការ ផ្ទេរអំណាចជូនប្រធានាធិបតីជាប់ឆ្នោតថ្មី។
ក្រសួងការបរទេសអាមេរិក បានបញ្ជាក់ថា នេះជាជំហានវិជ្ជមានមួយដើម្បីផ្ទេរអំណាចជូនប្រធានាធិបតីជាប់ឆ្នោតថ្មីលោកបៃឌិន។ នេះជាជំនួបលើកដំបូង ហើយត្រូវបានគេចាត់ទុកថាជាការទទួលស្គាល់ពីការបរាជ័យក្នុងការបោះឆ្នោតកាលពីថ្ងៃទី៣ខែវិច្ឆិកា។
កាលពីថ្ងៃទី១៤ខែធ្នូ តំណាងម្ចាស់ឆ្នោតបានបោះឆ្នោតគាំទ្រលោកបៃឌិនធ្វើជាប្រធានាធិបតីដឹកនាំអាមេរិក៤ឆ្នាំខាងមុខទៀត ។ ជាមួយគ្នានោះដែរ គណបក្សសាធារណរដ្ឋ ក៏បានប្រកាសទទួលស្គាល់លោកបៃឌិនជាអ្នកឈ្នះផងដែរ។
ប៉ុន្តែប្រធានាធិបតីដូណាល់ ត្រាំ មកទល់ពេលនេះនៅតែមិនទាន់ទទួលស្គាល់ការណ៍ពិត ដោយនៅតែបន្តទាមទារប្រែក្រឡាស់លទ្ធផលបោះឆ្នោត មុនពេល ប្រធានាធិបតីថ្មីចូលកាន់តំណែងនៅថ្ងៃទី២០ខែមករាឆ្នាំ២០២១ខាងមុខនេះ៕ដោយ៖ធី រីណា
