សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ម៉ូតូចំនួន៥គ្រឿងត្រូវបានក្រុមជនសង្ស័យធ្វើសកម្មភាពកាត់សោទ្វារចូលលួចយកទៅបាត់ដោយសុខសុវត្តិភាពមិនរំខានដល់សមត្ថកិច្ច។
ហេតុការណ៍នេះបង្កការភ្ញាក់ផ្អើលកាលពីវេលាម៉ោង៥និង៣០នាទីព្រឹក ថ្ងៃទី២៧ ខែធ្នូ ឆ្នាំ២០២០ ស្ថិតនៅក្នុងបរិវេណក្រុមហ៊ុនលាយបេតុង ក្នុងភូមិព្រៃរងៀង សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។
តាមប្រភពពីកន្លែងកើតហេតុបានឲ្យដឹងថាម៉ូតូដែលក្រុមជនសង្ស័យលួចចំនួន៥គ្រឿង ខាងលើ គ្រឿងទី១ម៉ាកឌ្រីមសង់ស៊េរីឆ្នាំ២០១៦ ទី២ម៉ាកឌ្រីមសង់ស៊េរីឆ្នាំ២០១៥ ទី៣ម៉ាកឌ្រីមសង់ស៊េរីឆ្នាំ២០១៨ ទី៤ម៉ាកឌ្រីមសង់ស៊េរីឆ្នាំ២០១៩ និងទី៥ម៉ូតូម៉ាកស្មាស់។
ប្រភពដដែលបានបន្តទៀតថានៅយប់ថ្ងៃទី២៦ ខែធ្នូនេះ ជនរងគ្រោះដែលជាបុគ្គលិកដែលធ្វើការនៅទីនោះបានទុកម៉ូតូនៅក្នុងបរិវេណខាងលើដូចសព្វដងព្រោះនៅជុំវិញទីនោះមានរបងចាក់សោត្រឹមត្រូវដោយគ្មានការព្រួយបារម្ភឡើយ ហើយពួកគេបានចូលសម្រាកនៅកន្លែងរៀងៗខ្លួន រហូតមកដល់វេលាព្រឹកថ្ងៃទី២៧ ខែធ្នូ ពេលដែលភ្ញាក់ពីដំណេកមកក៏ស្រាប់តែបាត់ម៉ូតូទាំង៥គ្រឿងនោះ ទើបនាំគ្នាផ្អើលឆោរឡោរាយការណ៍ទៅសមត្ថកិច្ចចុះពិនិត្យជាក់ស្តែង និងពិនិត្យមើលតាមរបងទ្វារមានស្នាមកាត់សោរបងទម្លុះដើម្បីយកម៉ូតូចេញ។
តាមប្រភពពីប្រជាពលរដ្ឋដែលនៅជុំវិញទីនោះបានឲ្យដឹងថាបទល្មើសដែលកើតមានក្នុងខណ្ឌកំបូលនេះមិនមែនតែ១ករណីហ្នឹងទេគឺមានច្រើន ដូចជាករណីដេញវាយកាប់យកទ្រព្យសម្បត្តិ គាស់បន្ទប់ជួល កាច់សោ.កម៉ូតូ ជាដើម ហាក់បីដូចអសន្តិសុខណាស់នាពេលកន្លងមក ដូច្នេះប្រជាពលរដ្ឋសូមសំណូមពរដល់លោក អធិការខណ្ឌកំបូល មេត្តាជួយពង្រឹងការល្បាតពួនស្ទាក់យ៉ាងយកចិត្តទុកដាក់ ដើម្បីឲ្យប្រជាពលរដ្ឋមានទំនុកចិត្ត លែងមានការព្រួយបារម្ភទៀត ប្រភពដដែលបានបន្តទៀតថាបានត្រឹមតែអាណិតជនរងគ្រោះដែលខំធ្វើការទម្រាំបានប្រាក់មកទិញម៉ូតូតែពេលនេះចប់ហើយ ព្រោះម៉ូតូដែលក្រុមជនសង្ស័យយកទៅប្រហែលគ្មានសង្ឃឹមបានមកវិញទេ។
ក្រោយពេលកើតហេតុសមត្ថកិច្ចបានចុះពិនិត្យជាក់ស្តែងនៅទីតាំងកន្លែងកើតហេតុ និងទទួលពាក្យបណ្តឹងរបស់ជនរងគ្រោះទាំង៥នាក់ដើម្បស្វែងរកមុខសញ្ញាជនសង្ស័យយកមកចាត់ការតាមនីតិវិធីច្បាប់៕
ដោយ៖សុខាសែនជ័យ
