សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នាវេលាម៉ោងប្រមាណ៩ព្រឹក ថ្ងៃទី២១ ខែមករា ឆ្នាំ២០២១នេះ មានខ្មាន់កាំភ្លើងដែលសង្ស័យថា ជាជនជាតិចិន បានធ្វើសកម្មភាពបាញ់ប្រហារបុរសជនជាតិចិនម្នាក់ដូចគ្នា បណ្ដាលឲ្យស្លាប់ក្នុងថ្លុកឈាម និងរបួសធ្ងន់ម្នាក់ នៅក្នុងមុខកាស៉ីណូ ជីយវនីសិន ស្ថិតក្នុងក្រុងព្រះសីហនុ ខេត្តព្រះសីហនុ។
សមត្ថកិច្ចបានបញ្ជាក់ថា, ជនរងគ្រោះជាជនជាតិចិន ជិះរថយន្ដមួយគ្រឿង ម៉ាក Rang Rover ពណ៌ខ្មៅ ពាក់ស្លាកលេខភ្នំពេញ2AL-9459។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានប្រាប់សារព័ត៌មានឲ្យដឹងនៅមុននេះបន្ដិចថា ក្រោយកើតហេតុ លោកបានបញ្ជាកម្លាំងជំនាញព្រហ្មទណ្ឌភ្លាមៗ ពិសេសកម្លាំងអន្ដរាគមន៍ពិសេស សហការជាមួយអធិការដ្ឋាននគរបាលក្រុងព្រះសីហនុ ដើម្បីឡោមព័ទ្ធទីតាំងកើតហេតុ និងស្រាវជ្រាវតាមឃាត់ជនបង្ក ដែលធ្វើសកម្មភាពដ៏សាហាវព្រៃផ្សៃនេះ។
លោកឧត្តមសេនីយ៍ទោ ជួន ណារិន្ទ បានបញ្ជាក់ឲ្យដឹងទៀតថា, ជនដៃដល់ជាខ្មាន់កាំភ្លើងដែលធ្វើសកម្មភាពបានជិះរថយន្ដមួយ ហើយស្រាប់តែយកទៅផ្លុងរថយន្ដនោះចោលនៅជិតផ្សារដំរី៥ ហើយចុះរត់គេចខ្លួនតែម្ដង ក្រោយដឹងថាកម្លាំងជំនាញកំពុងតាមឃាត់ខ្លួន។
លោកស្នងការបញ្ជាក់ថា, ខ្មាន់កាំភ្លើងជិះរថយន្ដម៉ាក Ford Ranger Rapter ពណ៌ខ្មៅ ពាក់ស្លាកលេខភ្នំពេញ2BI-1413។
បើតាម លោកឧត្តមសេនីយ៍ស្នងការ បានអះអាងថា កម្លាំងជំនាញកំពុងតាមប្រមាញ់ខ្មាន់កាំភ្លើងយ៉ាងយកចិត្ដទុកដាក់ ដើម្បីឃាត់ខ្លួនមកផ្ដន្ទាទោសតាមច្បាប់។
ទោះបីជាយ៉ាងណា លោកឧត្តមសេនីយ៍ទោ ជួន ណារិន្ទ មិនទាន់អាចបញ្ជាក់ថា ដើមចមដែលនាំឲ្យមានអំពើបាញ់ប្រហារទាំងព្រឹកព្រលឹមនេះ បណ្ដាលមកពីមូលហេតុអ្វីនោះឡើយទេ។
សូមរំលឹកផងដែរថា, ការបាញ់ប្រហារគ្នា នឹងការប្រើអំពើហិង្សា បានកើតឡើងជាញឹកញាប់នៅខេត្តព្រះសីហនុ ជាពិសេសបង្កឡើងដោយជនជាតិចិន ។ ពួកគេថែមទាំងមាននូវកាំភ្លើងប្រើប្រាស់ ដែលគេដាក់ភាពសង្ស័យថា អាចនឹងមានអ្នកធំណាមួយ នៅពីក្រោយខ្នង របស់ពួកទាំងនេះ ឬជាប់ពាក់ព័ន្ធក្នុងការរកស៊ីជាមួយគ្នា។ ដូច្នេះដើម្បីលុបបំបាត់នូវបទល្មើសទាំងនេះ ចៀសវាងកើតមានក្នុងសង្គម គួរតែអាជ្ញាធរ សមត្ថកិច្ច ធ្វើស្ថិតិ ចុះរដ្ឋបាល អោយបានញឹកញាប់ ទើបអាចកាត់បន្ថយបទល្មើសបាន។
ជុំវិញករណីខ្មាន់កាំភ្លើងបាញ់ខាងលើនេះ បើតាមការអះអាង របស់លោកឧត្តមសេនីយ៍ទោ ជួន ណារិន ស្នងការនគរបាលខេត្តព្រះសីហនុ បានបញ្ជាក់ថា, នៅពេលនេះកម្លាំងកំពុងតែក្តោបមុខសញ្ញា និងតាមប្រមាញ់ ឃាត់ខ្លួនជនដៃដល់យកមកផ្តន្ទាទោសទៅតាមផ្លូវច្បាប់៕
ដោយ៖ សិលា
