សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានបើករថយន្តមកចតនៅមុខផ្សារទំនើប រួចចូលទៅខាងក្នុងសម្រាកមួយភ្លែតក៏ត្រូវបានក្មេងស្ទាវមួយក្រុមប្រដាប់ដោយឈើជ្រុងនិងដុំថ្មមកវាយកម្ទេចរថយន្ត។ពេលឃើញដូច្នេះម្ចាស់រថយន្តបានរត់ចេញពីក្នុងម៉ាតសំដៅទៅមើលរថយន្តក៏ត្រូវជនបង្កវាយបែកក្បាលហូរឈាមកក្លាក់ រួចនាំគ្នារត់ឡើងជីះម៉ូតូរត់បាត់ស្រមោល។
ហេតុការណ៍នេះបង្កឲ្យមានការភ្ញាក់ផ្អើលឡើងនៅវេលាម៉ោង២និង២០នាទីរំលងអធ្រាត្រឈានចូលថ្ងៃអាទិត្យទី២១ ខែកុម្ភៈឆ្នាំ២០២១ ស្ថិតនៅតាមបណ្ដោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុខ្លួនគាត់បានបើករថយន្តម៉ាកតូយ៉ូតាព្រូស ពណ៌ខ្មៅពាក់ស្លាក ភ្នំពេញ 2-AK 0364 ធ្វើដំណើរចេញពីផ្ទះមកហូបចំណីអាហារជាមួយមិត្តភក្តិជិតនឹងកន្លែងកើតហេតុរួចក៏បានបើករថយន្តចេញមកវិញចូលទៅឈប់នៅមុខម៉ាតចូលសម្រាកមួយភ្លែតស្រាប់តែមានក្រុមក្មេងស្ទាវមួយក្រុមប្រដាប់ដោយដំបង និងឈើជ្រុងជិះម៉ូតូមកឈប់ហើយវាយទៅលើរថយន្តបណ្តាលឲ្យបែកកញ្ចក់និងទ្វារ រួចម្ចាស់រថយន្តបានរត់ចេញពីក្នុងម៉ាតសំដៅមកមើលរថយន្តក៏ត្រូវជនបង្កវាយបែកក្បាលរងរបួស រួចនាំគ្នារត់ឡើងម៉ូតូជិះរត់ខ្លួនបាត់ស្រមោល។
បន្ទាប់កើតហេតុសមត្ថកិច្ចមូលដ្ឋានបានចុះមកដល់រួចឲ្យជនរងគ្រោះទៅដាក់ពាក្យបណ្តឹងនៅប៉ុស្តិ៍នគបាលរដ្ឋបាលសង្កាត់ចោមចៅទី៣ ដើម្បីឲ្យសមត្ថកិច្ចតាមស្រាវជ្រាវ តាមស្វែងរកក្រុមជនសង្ស័យ ដើម្បីឃាត់ខ្លួនមកដោះស្រាយទៅតាមនីតិវិធី៕
ដោយ៖ជ្រោយ ពេជ្រ
