គ្រាន់តែជីវិតខ្លួនឯងសោះ ហេតុអ្វីក៏អ្នកគេចវេះពីការធ្វើចត្តាឡីស័ក ! ទីបំផុតសមត្ថកិច្ចឃាត់ខ្លួនបាន និងមានពិន័យ ជាមួយទោសទណ្ឌទៀត

ខេត្តបាត់ដំបង៖ ពលករខ្មែរមកពីប្រទេសថៃ៧នាក់ គេចវេះពីការធ្វើចត្តាឡីស័ក ត្រូវសមត្ថកិច្ចតាមខ្សែបន្ទាត់ព្រំដែន ឃាត់ខ្លួន ខណៈមួយរយៈនេះ ទាំងនគរបាលការពារព្រំដែនគោក កម្លាំងយោធា មានការប្រុងប្រយ័ត្នខ្ពស់បំផុតការពារតាមព្រំដែន ជាពិសេសទប់ស្កាត់ការឆ្លងដែនខុសច្បាប់។

សូមបញ្ជាក់ថា, ពលករខ្មែរចំនួន៧នាក់ ត្រូវបានកម្លាំងសមត្ថកិច្ចប្រចាំការ នៅបន្ទាប់ព្រំដែនកម្ពុជា-ថៃ ឃាត់ខ្លួន បន្ទាប់ពីពួកគេបានឆ្លងដែនមកពីប្រទេសថៃ ហើយគេចវេះមិនធ្វើចត្តាឡីស័ក។

លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានដកស្រង់សេចក្តីរាយការណ៍ របស់មន្ទីរព័ត៌មានខេត្តបាត់ដំបង បង្ហោះលើ Facebook ផ្លូវការរបស់លោកនៅព្រឹកថ្ងៃទី២៥ ខែកុម្ភៈ ឆ្នាំ២០២១នេះថា កម្លាំងអន្តរាគមន៍ឈរជើងតាមខ្សែបន្ទាត់ព្រំដែន ក្នុងស្រុកសំពៅលូន ខេត្តបាត់ដំបង ចំណុចប៉ុស្ថិ៍នគរបាលការពារព្រំដែនគោកលេខ៨១៧ (គីឡូ៩) បានឃាត់ពលករខ្មែរឆ្លងដែន មកពីប្រទេសថៃចំនួន៧នាក់ (ស្រី២នាក់ រួមទាំងក្មេងប្រុសម្នាក់ផង) ដែលគេចវេះមិនព្រមចូលធ្វើចត្តាឡីស័ក ស្ថិតនៅភូមិរស្មី ឃុំជ្រៃសីម៉ា ស្រុកសំពៅលូន នៅថ្ងៃទី ២៤ខែកុម្ភៈឆ្នាំ ២០២១។
បច្ចុប្បន្នពលករទាំង៧នាក់ ត្រូវសមត្ថកិច្ចចម្រុះដឹកតាមរថយន្ត ដើម្បីបញ្ជូនទៅមណ្ឌលចត្តាឡីស័ក ស្រុកសំពៅលូន។
ដោយឡែកកាលពីល្ងាចថ្ងៃទី២៤ ខែកុម្ភៈ ឆ្នាំ២០២១ សមត្ថកិច្ចបានឃាត់ខ្លួនពលករឆ្លងដែនពីប្រទេសថៃចំនួន១៤នាក់ មានប្រុស៧នាក់ និងស្រី៥នាក់ ព្រមទាំងក្មេង២នាក់ ស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបងបញ្ជូនទៅមណ្ឌលចត្តាឡីស័ក៕

ដោយ៖ សិលា