សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កន្លងមករហូតដល់បច្ចុប្បន្ននេះ រដ្ឋបាលរាជធានីភ្នំពេញបានយកចិត្តទុកដាក់ពីបញ្ហា ការខូចផ្លូវ ការរលប់គំនូសសញ្ញាចរាចរណ៍ ការកកស្ទះចរាចរណ៍ និងរៀបចំសណ្ដាប់ធ្នាប់នៅតាមបណ្ដាមហាវិថីតូចធំនិងផ្លូវតូចៗមួយចំនួនធំក្នុងមូលដ្ឋានទាំង១៤ខណ្ឌ ដើម្បីកាត់បន្ថយការកកស្ទះចរាចរណ៍ និងលើកសោភណ្ឌភាពទៅក្រុងផងដែរ។
ជាក់ស្ដែងថ្ងៃទី២៩ ខែមីនា ឆ្នាំ២០២១ សកម្មភាពលាបគំនូសសញ្ញាចរាចរណ៍ របស់មន្ទីសាធារណៈការ បានបន្តលាបគំនូសសញ្ញាចរាចរណ៍ តាមបណ្ដោយមហាវិថីព្រះនរោត្តម ចាប់ពីរមណីយដ្ឋានប្រវត្តិសាស្ត្រវត្តភ្នំ ដល់វិមានឯករាជ្យ មូលដ្ឋាន ខណ្ឌដូនពេញ
រាជធានីភ្នំពេញ។
មន្រ្តីជំនាញបានបញ្ជាក់ថា ដោយសង្កេតឃើញថា នៅតាមបណ្ដោយមហាវិថីព្រះនរោត្តម នេះ គំនូសសញ្ញាចរាចរណ៍មានការរលប់បាត់ស្ទើទាំងស្រុង ដូច្នេះមន្ទីសាធារណៈការ បានចាត់កម្លាំងចុះអ៊ុតគំនូសសញ្ញាថ្មីឡើងវិញ ដើម្បីអោយបងប្អូនប្រជាពលរដ្ឋងាយស្រួលក្នុងការបញ្ជាយានយន្ត។
ដូចនេះរដ្ឋបាលរាជធានីភ្នំពេញ បានបន្តជួសជុល អ៊ុតកៅស៊ូនិងលាបពណ៌គំនូសចរាចរណ៍ បង្ហើយការសាងសង់ ដើម្បី ដាក់ជូនបងប្អូនប្រជាពលរដ្ឋធ្វើដំណើរងាយស្រួល មិនបង្កការកកស្ទះដូចពេលកន្លងមក៕
ដោយ៖ រ៉ារ៉ា
