សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សូមជម្រាបថា ត្រឹមថ្ងៃទី២៥ ខែមេសា ឆ្នាំ២០២១ រាជរដ្ឋាភិបាលកម្ពុជា បានចាក់វ៉ាក់សាំងការពារកូវីដ-១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន ១,២៩៥,៦៦០នាក់។
សម្តេចតេជោ ហ៊ុន សែន បញ្ជាឲ្យរៀបចំ «យុទ្ធនាការជាតិចាក់វ៉ាក់សាំង» ជូនប្រជាពលរដ្ឋទូទៅអាយុពី១៨ឆ្នាំឡើង នៅរាជធានីភ្នំពេញ និងទីប្រជុំជនខេត្តកណ្តាល ឲ្យបានលឿន និងរហ័ស ក្នុងរយៈពេលខ្លី ជាការគិតគូរខ្លាំងបំផុតដល់ជនរួមជាតិ។
តាមរយៈការទទួលខុសត្រូវខ្ពស់ចំពោះជនរួមជាតិ សម្តេចតេជោ ហ៊ុន សែន បានបញ្ជាយ៉ាងដូច្នេះថា៖ «គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ត្រូវរៀបចំកែសម្រួល វិធីសាស្ត្រ និងផែនការចាក់វ៉ាក់សាំងការពារជំងឺកូវីដ- ១៩ ឱ្យក្លាយទៅជា “យុទ្ធនាការជាតិចាក់វ៉ាក់សាំង” ដោយប្រើប្រាស់កម្លាំងសរុប និងមធ្យោបាយសរុបរបស់ជាតិ ដើម្បីជំរុញការចាក់វ៉ាក់សាំងនេះឱ្យបានលឿន និងឆាប់រហ័ស ក្នុងរយៈពេលដ៏ខ្លី សម្រាប់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅឱ្យបានគ្រប់រូប នៅក្នុងភូមិសាស្រ្តរាជធានីភ្នំពេញ និងទីប្រជុំជនធំៗនៃខេត្តកណ្តាល ដែលមានមនុស្សច្រើនកុះករធ្វើការ និងរស់នៅសំដៅបង្កើតឱ្យមានភាពស៊ាំសហគមន៍ (Herd Immunity) ដើម្បីធានាប្រសិទ្ធភាព ក្នុងការគ្រប់គ្រងការឆ្លងរាលដាលនៃជំងឺកូវីដ-១៩ និងជាពិសេស បញ្ចៀសឱ្យបាននូវការបិទខ្ទប់ជាថ្មីសម្រាប់ភូមិសាស្ត្រនេះ»។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាឲ្យគណៈកម្មការចំពោះកិច្ចចាក់វ៉ាក់សាំងកូវីដ-១៩ រៀបចំ «យុទ្ធនាការជាតិចាក់វ៉ាក់សាំង» ឱ្យបានលឿន និងឆាប់រហ័ស ក្នុងរយៈពេលដ៏ខ្លី ជូនបងប្អូនប្រជាពលរដ្ឋទូទៅដែលមានអាយុចាប់ពី១៨ ឆ្នាំឡើងទៅឱ្យបានគ្រប់រូបនៅក្នុងភូមិសាស្រ្តរាជធានីភ្នំពេញ និងទីប្រជុំជនធំៗនៃខេត្តកណ្តាល។ (ដោយលែងគិតលើជនអទិភាពចាក់មុន ឬចាក់ក្រោយទៀតហើយ)។
ការបញ្ជារបស់សម្តេចតេជោនាយករដ្ឋមន្ត្រី ធ្វើឡើងតាមរយៈសេចក្តីសម្រេចរបស់រាជរដ្ឋាភិបាល ស្តីពីការបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលជំងឺកូវីដ-១៩ ដែលចេញផ្សាយ នៅថ្ងៃទី២៦ ខែមេសា ឆ្នាំ២០២១នេះ។
សម្តេចតេជោប្រមុខរាជរដ្ឋាភិបាល ក៏ណែនាំឲ្យគណៈកម្មការចំពោះកិច្ចចាក់វ៉ាក់សាំងកូវីដ-១៩ ត្រូវអនុវត្ត «យុទ្ធនាការជាតិចាក់វ៉ាក់សាំង» ត្រូវធានាឱ្យបាននូវរបៀបរៀបរយ និងសណ្តាប់ធ្នាប់ ដើម្បីបង្ការការឆ្លងរាលដាលនៃជំងឺកូវីដ-១៩ ក្នុងអំឡុងពេលនៃកិច្ចដំណើរការនេះ ពិសេសតាមរយៈគោលការណ៍នាំយកសេវា ទៅកៀកបំផុតជូនប្រជាពលរដ្ឋ។
រាជរដ្ឋាភិបាលបានសម្រេចបន្តការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩ សម្រាប់រយៈពេល ៧ (ប្រាំពីរ) ថ្ងៃបន្តទៀត រហូតដល់ថ្ងៃទី៥ ខែឧសភា ឆ្នាំ២០២១ តាមរយៈសេចក្តីសម្រេចលេខ៥៤ សសរ ចុះថ្ងៃទី២៦ ខែមេសា ឆ្នាំ២០២១!
រយៈពេលនៃការបិទខ្ទប់នេះ អាចត្រូវបានបន្តបន្ថែមទៀត អាស្រ័យលើការចូលរួមអនុវត្តរបស់ប្រជាពលរដ្ឋនៅក្នុងតំបន់បិទខ្ទប់ និងស្ថានភាពនៃការវិវត្តនៃការឆ្លងរាលដាលនៃជំងឺកូវីដ-១៩។
ភូមិសាស្រ្តដែលត្រូវបានបិទខ្ទប់ ត្រូវបានបែងចែកជា “តំបន់ក្រហម”, “តំបន់លឿងទុំ” និង “តំបន់លឿង”៕
ដោយ ៖ សិលា
