សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ ស្រ្តីជាកម្មករសំណង់ម្នាក់បានស្លាប់បាត់បង់ជីវិតចោលប្តីនិងកូនគួរឱ្យអាសូរ ដោយសារត្រូវរន្ទះបាញ់ពេលកំពុងជិះម៉ូតូក្រោមមេឃខ្មៅដ៏អួអាប់រកកលចង់ភ្លៀង ។
ហេតុការណ៍នេះកើតឡើងនៅវេលាម៉ោង ១៤និង០០នាទី ថ្ងៃទី២៧ ខែមេសា ឆ្នាំ២០២១ នៅចំណុចក្បាលវាលវង់ខាងកើត ស្ថិតនៅភូមិវាលខ្សាច់ ឃុំរអាង ស្រុកកំពង់សៀម ខេត្តកំពង់ចាម ។
សមត្ថកិច្ចបានឱ្យដឹងថា ជនរងគ្រោះ ឈ្មោះ ឈួន រ៉ាវី ភេទស្រី អាយុ៣៦ឆ្នាំមានទីលំនៅភូមិត្រពាំងស្រស់ ឃុំក្រឡា ស្រុកកំពង់សៀម ខេត្តកំពង់ចាម ។
មុនកើតហេតុស្រ្តីរងគ្រោះបានបើកម៉ូតូម្នាក់ឯងត្រឡប់មកផ្ទះវិញក្រោយពីបញ្ចប់ការងារជាកម្មករសំណង់នៅឃុំរមូល ពេលដែលមេឃកំពុងងងឹតអួអាប់ និងខ្យល់បោកបក់រកកលចង់ភ្លៀង លុះស្ត្រីរងគ្រោះបើកម៉ូតូមកដល់កន្លែងកើតហេតុ ក៏ត្រូវរន្ទះបាញ់ស្លាប់តែម្តង ។
ករណីនេះក្រោយកើតហេតុភ្លាមៗសមត្ថកិច្ចនគរបាលបានចុះទៅដល់ដើម្បីកោសល្យវិច័យសព ហើយបានបញ្ជាក់ថា ជនរងគ្រោះពិតជាស្លាប់ដោយសារគ្រោះធម្មជាតិប្រាកដមែន រួចសពត្រូវបានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ វណ្ណៈ
