សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ត្រូវបានសមត្ថកិច្ចធ្វេីការឃាត់ខ្លួនបន្ទាប់ពីបេីករថយន្តកុងតឺន័របុកបារាសសមត្ថកិច្ចកាលពីវេលាម៉ោង៥ព្រឹក ថ្ងៃទី២៨ ខែមេសា ឆ្នាំ២០២១ នៅចំណុចគោលដៅរឹតបន្តឹងតំបន់បិទខ្ទប់ តាមបណ្តោយផ្លូវជាតិលេខ៤ មុខបុរីសែនមនោរម្យ ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីសមត្ថកិច្ចបានឱ្យដឹងថា មុនពេលកេីតហេតុមានរថយន្តកុងតឺន័រ ពណ៌ខៀវ ពាក់ស្លាកលេខភ្នំពេញ3C-9151 បើកឆ្លងកាត់គោលដៅដែលកំពុងបិទខ្ទប់ ហើយសមត្ថកិច្ចក៏បេីកបារាសឲ្យបន្តដំណេីរទៅមុខ។
សមត្ថកិច្ចបានបន្តថា លុះមួយសន្ទុះក្រោយមកស្រាប់តែរថយន្តខាងលេីត្រឡប់មកវិញ ពេលនោះសមត្ថកិច្ចក៏បិទមិនឲ្យចូលវិញ ហើយភ្លាមៗនោះរថយន្តខាងលេីក៏បេីកបំបុកបារាសបណ្តាលឲ្យដួលរាយប៉ាយពេញផ្លូវតែម្តង ប៉ុន្តែសំណាងដែរដែលមិនមានមនុស្សរងរបួស រួចហេីយរថយន្តបង្កបានព្យាយាមបេីករត់បានចម្ងាយប្រហែល៤០០មែត្រទេីបសមត្ថកិច្ចសហការជាមួយប្រជាពលរដ្ឋឃាត់បានភ្លាមៗតែម្តង។
ក្រោយកេីតហេតុសមត្ថកិច្ចបាននាំខ្លួនតៃកុងរថយន្តបង្កទៅអធិការដ្ឋាននគរបាលខណ្ឌពោធិ៍សែនជ័យដេីម្បីចាត់ការតាមផ្លូវច្បាប់៕
ដោយ៖ សុខាសែនជ័យ
