សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ សូមចូលរួមរំលែកទុុក្ខក្រុមគ្រួសារផង ខណៈដែលកម្មការិនីររោងចក្រម្នាក់ ដែលមានផ្ទៃពោះ៧ខែ មានវិជ្ជមានជំងឺកូវីដ-១៩នោះ ពេលនេះទទួលមរណៈភាពហើយ កាលពីយប់ថ្ងៃទី០៧ ខែឧសភា ឆ្នាំ២០២១។ នេះបេីតាមការបញ្ជាក់ពីលោក វ៉ី សំណាង អភិបាលខេត្តកំពង់ស្ពឺ បានថ្លែងនៅព្រឹកថ្ងៃទី០៨ ខែឧសភា ឆ្នាំ២០២១នេះ។
ជាក់ស្ដែងយោងតាមលិខិតមរណៈភាពរបស់ មន្ទីរពេទ្យខេត្តកំពង់ស្ពឺ បានបញ្ជាក់ថា ស្ដ្រីដែលវិជ្ជមានជំងឺកូវីដ-១៩ ដោយបានទទួលមរណៈភាពនេះ ឈ្មោះ សុត ម៉ៃ អាយុ៣០ឆ្នាំ រស់នៅភូមិគោកដង្កោ ឃុំពេជ្រមុនី ស្រុកគងពិសី ខេត្តកំពង់ស្ពឺ ធ្វើការនៅរោងចក្រក្នុងស្រុកអង្គស្នួល ខេត្តកណ្ដាល។ កម្មការិនីរូបនេះ បានចូលសម្រាកព្យាបាលនៅមន្ទីរពេទ្យបង្អែកខេត្ត មុនការស្លាប់ប្រហែល៣០នាទី។
បេីតាមសេចក្តីប្រកាសព័ត៌មានពី លោក វ៉ី សំណាង អភិបាលខេត្តកំពង់ស្ពឺ បានថ្លែងបន្តថា កម្មការិនីរោងចក្រដែលទទួលមរណៈភាពនេះ មានផ្ទៃពោះ៧ខែ ហើយនៅពេលមានអាការៈសង្ស័យដំបូង គាត់មិនបានមកជួបក្រុមគ្រូពេទ្យ ឬយកសំណាកពិនិត្យរកជំងឺកូវីដ-១៩នោះទេ លុះស្ថានភាពកាន់តែធ្ងន់ធ្ងរទើបក្រុមគ្រួសារបញ្ជូនមកមន្ទីរពេទ្យ ដោយមានការសង្ស័យក្រុមគ្រូពេទ្យ បានបញ្ជូនមកមន្ទីរពេទ្យខេត្ត ហើយពេលកំពុងសង្គ្រោះបានប្រហែល៣០នាទី គាត់ក៏ទទួលមរណៈភាពតែម្ដង។
ជាមួយគ្នានេះ រដ្ឋបាលខេត្តកំពង់ស្ពឺ ក៏បានអំពាវនាវដល់ប្រជាពលរដ្ឋ ពិសេសកម្មករ កម្មការិនី ដែលបម្រើការងារនៅរោងចក្រមានជាប់ពាក់ព័ន្ធជាមួយជំងឺកូវីដ-១៩ ត្រូវផ្ដល់ព័ត៌មានជូនអាជ្ញាធរមានសមត្ថកិច្ច ឬមន្ដ្រីសុខាភិបាល ដើម្បីយកសំណាកក្នុងករណីសង្ស័យ ដោយមិនត្រូវទុក្ខឲ្យខ្លួនឯងធ្លាក់ក្នុងស្ថានភាពធ្ងន់ធ្ងរនោះទេ៕ដោយ ៖ សហការី
