សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត ៖ លោកស្រី ថាក់ ឡានី អតីតសមាជិកព្រឹទ្ធសភាអតីតបក្សសង្គ្រោះជាតិដែលនិរទ្ទេសខ្លួនទៅក្រៅប្រទេស ដង្ហែតាមមេឧទ្ទាមក្រៅច្បាប់ដឹកនាំដោយបុគ្គល សម រង្ស៊ី គេចពីសំណាញ់ច្បាប់កម្ពុជា នៅពេលនេះបានវិលត្រឡប់មកដល់មាតុប្រទេសវិញ នៅវេលាម៉ោងជាង១២ នៅថ្ងៃទី១៤ ខែឧសភាឆ្នាំ២០២១នេះ តាមច្រកទ្វារអន្តរជាតិប៉ោយប៉ែតខេត្តបន្ទាយមានជ័យ។ការវិលត្រឡប់នេះគឺដោយសារមានការលើកលែងទោសកំឡុងខែមីនា កន្លងមករួចហើយ។
លោកស្រី ថាក់ ឡានី បានប្រាប់អ្នកកាសែតដោយក្តីរំភើបរីករាយរកអ្វីប្រៀបផ្ទឹមពុំបាន ដែលមានឱកាសវិលត្រលប់មកកាន់មាតុភូមិវិញ ក្រោមការសណ្ដោសប្រោសប្រណីពីសម្តេចតេជោ ហ៊ុន សែន នាយករដ្ឋមន្ត្រី។
លោកស្រី បញ្ជាក់ថា ចាប់តាំងពីលោកស្រីចេញពីប្រទេសកម្ពុជាទៅស្នាក់នៅប្រទេសស៊ុយអែតតាមអតីតមេដឹកនាំនៃអតីតបក្សប្រឆាំង លោកស្រី បានរស់នៅម្នាក់ឯង កណ្ដោចកណ្ដែង ដូចចកនៅកណ្ដាលលំហសមុទ្រ គ្មានកោះគ្មានត្រើយ ហើយអតីតមេដឹកនាំ នៃអតីតបក្សប្រឆាំង មិនដែលមកសួរសុខទុក្ខលោកស្រីម្ដងណាឡើយ។ នៅពេលលោកស្រីមានទុក្ខព្រួយ លោកស្រីតែងនឹកឃើញមេដឹកនាំ ដែលលោកស្រីជឿទុកចិត្តតែម្នាក់គត់ ដែលអាចជួយសង្គ្រោះលោកស្រីបាន គឺសម្ដេចតេជោ ហ៊ុន សែន។
លោកស្រីនិងស្វាម៉ីគោរពថ្លែងអំណរគុណ សម្ដេចតេជោ ហ៊ុន សែន នាយករដ្ឋមន្ត្រី ដែលតែងជួយដោះស្រាយទុក្ខលំបាកដល់ប្រជាពលរដ្ឋកម្ពុជាគ្រប់ស្រទាប់វណ្ណៈ ដោយមិនប្រកាន់និន្នាការនយោបាយឡើយ ។
គួរបញ្ជាក់ថា លោកស្រី ថាក់ ឡានី ត្រូវបានប្រមុខរដ្ឋស្ដីទីចេញព្រះរាជក្រឹត្យ លើកលែងទោស កាលពីថ្ងៃទី៣ ខែមីនា ឆ្នាំ២០២១ តាមការស្នើសុំរបស់សម្ដេចតេជោ ហ៊ុន សែន នាយករដ្ឋមន្ត្រី៕
ដោយ៖ សូរិយា
