យុវជនម្នាក់ជិះម៉ូតូលឿនជ្រុល ទៅបុករុឺម៉កអេតចាយ បែកក្បាលហូរឈាមដេកស្តូកលើផ្លូវរងរបួសធ្ងន់

ភ្នំពេញ ៖ យុវជនម្នាក់ជិះម៉ូតូលឿនដូចហោះ ទៅបុកនឹងរុឺម៉កអេតចាយ បណ្ដាលឲ្យរងរបួសធ្ងន់ ហេតុការណ៍នេះបានកើតឡើង កាលពីម៉ោង ៥ទៀបភ្លឺ ថ្ងៃទី១៨ ខែមិថុនា ឆ្នាំ២០២១ នៅតាមបណ្ដោយផ្លូវហាណូយ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថាជនរងគ្រោះឈ្មោះ អ៊ុំ សុខសុវណ្ណា ស្នាក់នៅខណ្ឌដង្កោ រាជធានីភ្នំពេញ មុខរបរជាមន្ត្រីអន្តរាគមន៍ ។

ប្រភពព័ត៌មានពីសមត្ថកិច្ចនគរបាលខណ្ឌសែនសុខ បានឲ្យដឹងថា ជនរងគ្រោះជិះម៉ូតូហុងដាឌ្រីមសេ១២៥ ពាក់ស្លាកលេខ ភ្នំពេញ 1IE-3163 បើកបរដោយយុវជនម្នាក់ ក្នុងល្បឿនយ៉ាងលឿន ទិសដៅពីជើងទៅត្បូង ខណៈមកដល់ចំណុចកើតហេតុ បានបុករុឺម៉កអេតចាយ បណ្ដាលឲ្យរបួសធ្ងន់ ត្រូវបានក្រុមគ្រូពេទ្យធ្វើការសង្គ្រោះបឋមភ្លាមៗផងដែរ ។

បន្ទាប់ពីកើតហេតុសមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌសែនសុខ បានហៅរថយន្តសាមុយ មកដឹកជនរងគ្រោះទៅកាន់មន្ទីរពេទ្យ។ ចំណែកម៉ូតូរបស់ជនរងគ្រោះ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលខណ្ឌសែនសុខរង់ចាំសាច់ញាតិមកទទួលយក ៕

ដោយ៖ ជ្រោយពេជ្រ