សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារព័ត៌មាន Reuters នៅថ្ងៃចន្ទ ទី២៨ ខែមិថុនា ឆ្នាំ២០២១នេះ បានដកស្រង់ចេញផ្សាយពីមន្រ្តីយោធាសហរដ្ឋអាមេរិក បានអះអាងថា ជាការឆ្លើយតបទៅនឹងការវាយប្រហារដោយយន្ដហោះដ្រូនប្រឆាំងយោធាអាមេរិកនៅអ៉ីរ៉ាក់ ខ្លួនបានដឹកនាំការវាយប្រហារតាមផ្លូវអាកាសលើមូលដ្ឋានរបស់ក្រុមសកម្មប្រយុទ្ធគាំទ្រដោយអ៉ីរ៉ង់ នៅក្នុងប្រទេសអ៉ីរ៉ាក់ និងស៊ីរី។
ជាក់ស្ដែងនៅក្នុងសេចក្ដីថ្លែងការណ៍ចេញផ្សាយដោយយោធាអាមេរិក បានឱ្យដឹងកាលពីថ្ងៃអាទិត្យម្សិលមិញនេះថា៖ ចំពោះការវាយប្រហារតាមផ្លូវអាកាសខាងលើនេះ គឺមានគោលដៅលើ ឃ្លាំងស្ដុកអាវុធចំនួន២របស់ក្រុមសកម្មប្រយុទ្ធគាំទ្រដោយអ៉ីរ៉ង់នៅស៊ីរី និងមួយកន្លែងទៀតនៅក្នុងប្រទេសអ៉ីរ៉ាក់។
បើតាមអង្គការឃ្លាំមើលសិទ្ធិមនុស្សស៊ីរី ក៏បានឱ្យដឹងដែរថា ការវាយប្រហាររបស់យោធាអាមេរិក ក៏បានផ្ដាច់ជីវិតក្រុមសកម្មប្រយុទ្ធយ៉ាងហោច៥នាក់ផងដែរ។
គួរបញ្ជាក់ថា ការវាយប្រហារតាមផ្លូវអាកាសនេះ ធ្វើឡើងតាមបញ្ជាដោយផ្ទាល់ពីលោកចូ បៃដិន ហើយវាក៏ជាលើកទី២ហេីយ ដែលលោកបានចេញបញ្ជាឱ្យ បើកការវាយប្រហារបែបនេះ ទៅលើក្រុមសកម្មប្រយុទ្ធគាំទ្រដោយអ៉ីរ៉ង់ ចាប់តាំងពីលោក បៃឌិន ឡើងកាន់តំណែងជាប្រធានាធិបតីអាមេរិកកាលពីខែមករា កន្លងមក៕ដោយ៖ស តារា
