សារព័ត៌មាន នគរវត្ត តែងតែនាំមុខគេជានិច្ច
ក្លិបមាន់ខ្នាយមាស Tottenham បានតែងតាំងលោក Nuno Espirito Santo អតីតគ្រូបង្វឹកក្រុម Wolves ធ្វើជាអ្នកចាត់ការថ្មីក្នុងកិច្ចសន្យារយៈពេល២ឆ្នាំ។ នេះបើយោងតាមការចេញផ្សាយរបស់ BBC Sport និង Dailymail កាលពីថ្ងៃទី១ កក្កដា។
លោក Nuno បានចាកចេញពីក្លិប Wolves កាលពីខែឧសភាបន្ទាប់ពីដឹកនាំរដូវកាលដ៏គួរឱ្យចាប់អារម្មណ៍ចំនួន៤ដែលក្នុងអំឡុងពេលនោះគាត់បានជួយក្លិបឈានដល់វគ្គផ្តាច់ព្រ័ត្រ Europa League ។
Tottenham បានបណ្តេញលោក Jose Mourinho ចេញកាលពីខែមេសានិងបានជំនួសលោក Ryan Mason វ័យ២៩ឆ្នាំរហូតដល់ដំណាច់រដូវកាលមុន។ លោក Nuno Espirito Santo បាននិយាយថា “វាជាសេចក្តីរីករាយ និងកិត្តិយសដ៏ធំធេងមួយដែលបានមកចូលរួមជាមួយក្រុម Spurs ។ ខ្ញុំពិតជារីករាយនិងទន្ទឹងរង់ចាំការចាប់ផ្តើមការងារ។ យើងមិនមានថ្ងៃណាត្រូវបាត់បង់ទេ ហើយយើងត្រូវតែចាប់ផ្តើមធ្វើការភ្លាមៗនៅពេលដែលរដូវកាលចាប់ផ្តើមនៅប៉ុន្មានថ្ងៃទៀត”។
លោក Nuno Espirito Santo នឹងមិនមានពេលយូរទៀតទេដែលត្រូវរង់ចាំជួបជាមួយក្លិបចាស់របស់គេនៅពេលដែលក្រុម Spurs នឹងធ្វើដំណើរទៅទីក្រុង Molineux ដើម្បីជួបជាមួយក្រុម Wolves នៅក្នុងការប្រកួតលីករបស់ពួកគេនៅរដូវកាលថ្មីនៅថ្ងៃទី២២ ខែសីហា។
ប្រធានក្រុមជម្រើសជាតិអង់គ្លេស Harry Kane បាននិយាយកាលពីខែឧសភាថា គាត់សង្ឃឹមថានឹងមានការសន្ទនាល្អ និងស្មោះត្រង់ជាមួយប្រធានក្លិប Spurs លោក Daniel Levy អំពីអនាគតរបស់គាត់។
ក្លិប Tottenham បាននាំលោក Nuno បន្ទាប់ពីលោក Mauricio Pochettino, Antonio Conte, Paulo Fonseca និង Gennaro Gattusoត្រូវបានផ្សារភ្ជាប់ជាមួយនឹងការងារនៅរដូវក្តៅនេះ។ ក្លិបក៏បានទាក់ទងជាមួយគ្រូបង្វឹកក្លិប Paris St-Germain លោក Pochettino អំពីលទ្ធភាពនៃការវិលត្រឡប់របស់បុរសអាហ្សង់ទីនរូបនេះដើម្បីដឹកនាំ ប៉ុន្តែក្លិបបារាំងមិនបានត្រៀមអនុញ្ញាតឱ្យគាត់ទៅទេ។
អតីតគ្រូបង្វឹកតោខៀវ Chelsea លោក Conte បានបង្ហាញខ្លួនសម្រាប់តួនាទីនេះដោយបានចាកចេញពីក្រុម Inter Milan បន្ទាប់ពីដឹកនាំក្លិបឈ្នះជើងឯកក្របខ័ណ្ឌ Serie A ។ ចំណែកលោក Fonseca អតីតអ្នកចាត់ការទូទៅក្រុម Roma បានគិតថា គាត់នឹងទទួលបានការគាំទ្រពីលោក Gattuso ដែលត្រូវបានគេច្រានចោលភ្លាមៗនៅពេលដែលអ្នកគាំទ្រប្រតិកម្មយ៉ាងធ្ងន់ធ្ងរចំពោះការផ្សព្វផ្សាយតាមបណ្តាញសង្គម ។
គួររំលឹកថា លោក Nuno Espirito Santo បានឈ្នះជើងឯកលីកទី២អង់គ្លេស Championship ឆ្នាំ ២០១៧-២០១៨ ក្នុងរដូវកាលដំបូងរបស់គាត់ជាមួយក្រុមចចកខ្មៅ Wolves មុនពេលដឹកនាំពួកគេឈានដល់ចំណាត់ថ្នាក់ទី៧នៅ Premier League ក្នុងរយៈពេល២រដូវកាលបន្ទាប់ ខណៈដែលពួកគេបានបញ្ចប់ក្នុងចំណាត់ថ្នាក់ទី១៣កាលពីរដូវកាលមុន ៕
ដោយ ៖ ភារៈ
