សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សមត្ថកិច្ចនគរបាលប៉ុស្តិ៍កាកាបទី១បានឃាត់ខ្លួនជនសង្ស័យចំនួន៣នាក់ដែលកំពុងរៀបចំឧបករណ៍បម្រុងធ្វើសកម្មភាពលួច ។
ហេតុការណ៍ឃាត់ខ្លួននេះកម្លាំងសមត្ថកិច្ចបានធ្វើឡើងនៅវេលារំលងអធ្រាត្រឈានចូលថ្ងៃទី៧ ខែកក្កដា ឆ្នាំ២០២១ ស្ថិតនៅតាមបណ្ដោយផ្លូវបេតុង ក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ត្រី ទូច ទី នាយប៉ុស្តិ៍រដ្ឋបាលសង្កាត់កាកាបទី១ បានដឹកនាំមន្ត្រីនៅក្រោមឱវាទ ក្រោមការបញ្ជាផ្ទាល់ពីលោកវរសេនីយ៍ឯក ម៉ន វុធី អធិការនៃអធិការដ្ឋាននគរបាលខណ្ឌពោធិ៍សែនជ័យ ចុះល្បាតពួនស្ទាក់ដើម្បីការពារសន្តិសុខ សុវត្ថិភាព ជូនប្រជាពលរដ្ឋមូលដ្ឋាន ក៏ប្រទះឃើញជនសង្ស័យចំនួន១ក្រុមមានគ្នា៣នាក់កំពុងប៉ុនប៉ងធ្វើសកម្មភាពលួច។ ភ្លាមៗនោះកម្លាំងនគរបាលក៏បានឃាត់ខ្លួនជនសង្ស័យរួមនឹងវត្ថុតាងម៉ូតូចំនួន១គ្រឿង ដែកកែច្នៃសម្រាប់កាច់កម៉ូតូចំនួន១ កូនសោរខ្សៀចំនួន១ ដង្កាប់ចំនួន១ និងសម្ភារមួយចំនួនទៀត យកទៅសួរនាំនៅប៉ុស្តិ៍។
បច្ចុប្បន្នជនសង្ស័យត្រូវបានកម្លាំងនគរបាលប៉ុស្តិ៍រដ្ឋបាលសង្កាត់កាកាបទី១ កំពុងសាកសួរ ដើម្បីកសាងសំណុំរឿងបញ្ជូនទៅកាន់ជំនាញនៃអធិការដ្ឋានខណ្ឌចាត់ការបន្តតាមនីតិវិធី៕
ដោយ៖ជ្រោយពេជ្រ
