សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ បុរស២នាក់ ខណៈដែលកំពុងប្រមូលផលអនុផលព្រៃឈើខុសច្បាប់ នៅត្រង់ម្តុំត្រពាំងស្វាយទល់ ស្ថិតក្នុងភូមិក្រសាំង ឃុំឆែបមួយ ស្រុកឆែប ត្រូវបានកម្លាំងជំនាញផ្នែករដ្ឋបាលព្រៃឈើឆែប សហការជាមួយនិងកម្លាំងកងរាជអាវុធហត្ថស្រុក ចុះល្បាតព្រៃឈើសហគមន៍ក្រសាំង បានចាប់ឃាត់ខ្លួនពួកគេ ព្រមទាំងដកហូតវត្ថុតាងជាកស្ដែងផងដែរ។
នៅក្នុងប្រតិបត្តិការចុះបង្រ្កាបខាងលេីនេះ បានធ្វេីឡេីងកាលពីថ្ងៃទី៧ ខែកក្កដា ឆ្នាំ២០២១ ត្រង់ម្តុំត្រពាំងស្វាយទល់ ស្ថិតក្នុងភូមិក្រសាំង ឃុំឆែបមួយ ស្រុកឆែប ខេត្តព្រះវិហារ ។ ជាក់ស្ដែងក្រុមការងារបានដកហូតគោយន្ដពីរគ្រឿង ,រណាយន្ដពីរគ្រឿងនិងឈើអារប្រភេទលេខ១(ផ្ចឹក)ចំនួន៣០សន្លឹក ស្មើនឹង១,១៦៧ពីជនល្មើស។
បេីយោងតាមរបាយការណ៍របស់សមត្ថកិច្ច បានបញ្ជាក់បន្ថែមថា ជនសង្ស័យទី១,ឈ្មោះ នុ សឺម អាយុ២៥ឆ្នាំ ទីលំនៅភូមិឆែបលិច ឃុំឆែប១ ស្រុកឆែប។ វត្ថុតាងចាប់យករួមមាន៖ រណាយន្ដ ចំនួនមួយគ្រឿង,គោយន្ដមួយគ្រឿង និងឈើអារប្រភេទលេខ១(ផ្ចឹក) ចំនួន១៣សន្លឹក ស្មើនឹង០,៤៩៣។ និងទី២,ឈ្មោះ ស្រី ស៊ា អាយុ២៥ឆ្នាំ ទីលំនៅភូមិឆែបកើត ឃុំឆែប១។ វត្ថុតាងចាប់យករួមមាន៖ រណាយន្ដមួយគ្រឿង,គោយន្ដមួយគ្រឿង និងឈើអារប្រភេទលេខ១(ផ្ចឹក) ចំនួន១៧សន្លឹក ស្មើនឹង០,៦៧៤។
បច្ចុប្បន្ន ជនសង្ស័យទាំង២នាក់នេះ ត្រូវបានកម្លាំងជំនាញផ្នែករដ្ឋបាលព្រៃឈើឆែប បញ្ជូនទៅសាកសួរ ដេីម្បីចាត់ការតាមនីតិវិធីច្បាប់៕
ដោយ៖ សហការី
