សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានខ្ទាតចេញពីម៉ូតូរងរបួសស្រាល ខណៈកំពុងជិះម៉ូតូសុខៗស្រាប់តែត្រូវរថយន្តបែនធុនធំបុកពីក្រោយអូសចូលប្រឡាយទឹកស្អុយ បង្កការភ្ញាក់ផ្អេីលដល់ប្រជាពលរដ្ឋនិងសមត្ថកិច្ចមកចោមរោមមើលនិងធ្វើអន្តរាគមន៍។
ហេតុការណ៍គ្រោះថ្នាក់ចរាចរណ៍ដ៏គួរឱ្យរន្ធត់នេះបានកើតឡើងនៅវេលាម៉ោង៨និង៣០នាទីយប់ ថ្ងៃទី១៦ ខែកក្កដា ឆ្នាំ២០២១ តាមបណ្ដោយផ្លូវក្រវាត់ក្រុង៥០ម៉ែត្រ ក្នុងភូមិអន្លង់គងថ្មី សង្កាត់ព្រៃស ខណ្ឌដង្កោ ។
តាមសម្ដីបុរសដែលជាជនរងគ្រោះ ហើយមិនបានបញ្ជាក់ឈ្មោះបានប្រាប់ឱ្យដឹងថា មុនពេលកេីតហេតុរូបគាត់បានចេញពីធ្វេីការហើយក៏ជិះម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០១៨ ត្រឡប់ទៅផ្ទះវិញ ដោយធ្វេីដំណេីរតាមបណ្ដោយផ្លូវ៥០ម៉ែត្រក្នុងទិសដៅពីត្បូងទៅជេីង។ លុះបើកម៉ូតូមកដល់ចំណុចកេីតហេតុនេះស្រាប់តែមានរថយន្តបែនធុនធំមួយគ្រឿង ពណ៌សលាយខៀវ ចង្កូតស្ដាំ ពាក់ស្លាកលេខ SVR-0752 បើកយ៉ាងលឿនមកបុកពីក្រោយម៉ូតូគាត់ បណ្ដាលឲ្យគាត់ខ្ទាតចេញពីម៉ូតូរងរបួសស្រាល ចំណែកម៉ូតូត្រូវរថយន្តកិនអូសចូលក្នុងប្រឡាយទឹកស្អុយលិចបាត់ តែម្តង។
ក្រោយកេីតហេតុភ្លាមៗ តៃកុងរថយន្តបង្កបានចុះចេញពីរថយន្តទាំងស្ថានភាពស្រវឹង និងបានឈ្លោះប្រកែកគ្នាជាមួយជនរងគ្រោះនិងសមត្ថកិច្ច ទេីបសមត្ថកិច្ចមូលដ្ឋាននាំខ្លួនតៃកុងរថយន្តបង្ក និងហៅម្ចាស់ម៉ូតូទៅកាន់ប៉ុស្តិ៍នគរបាលរដ្ឋបាលព្រៃសដេីម្បីដោះស្រាយគ្នា ។ ក្រោយមក ភាគីរថយន្តបង្កបានព្រមយកម៉ូតូជនរងគ្រោះទៅធ្វើជាកម្មសិទ្ធិរបស់ខ្លួន ហេីយព្រមប្រគល់លុយចំនួន២.០០០$ឲ្យទៅភាគីខាងម៉ូតូដេីម្បីបញ្ចប់រឿង ៕
ដោយ ៖ ភារ៉ា ដង្កោ
