សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ រូបភាពយាយតាពីរនាក់ប្ដីប្រពន្ធដែលកាន់ដៃគ្នានៅគ្រាដែលច្រមុះដកដង្ហើមដោយជំនួយខ្យល់អុកស៊ីសែនហើយទទួលបានការចាប់អារម្មណ៍ពី មហាជននៅក្នុងបណ្ដាញសង្គមហ្វេសប៊ុកនោះ ពេលនេះលោកយាយទទួលមរណភាពហើយ។
លោកយាយ ជឹម ជន អាយុ៨២ឆ្នាំ នៅបាត់ដំបងត្រូវជាភរិយាលោកតា សាំង ម៉ោញ អាយុ៨៧ឆ្នាំ បានទទួលអនិច្ចកម្មហេីយនៅវេលាម៉ោង ៤និង១៥នាទីទៀបភ្លឺ ថ្ងៃទី២២ ខែកក្កដា ឆ្នាំ២០២១។
លោកតានិង លោកយាយ ទាំងពីរនាក់ប្ដីប្រពន្ធចេញរោគសញ្ញានៅថ្ងៃទី១០ ខែកក្កដា ឆ្នាំ២០២១ ហេីយត្រូវបានយកវត្ថុវិភាគនៅមន្ទីរពេទ្យបង្អែកឯកភ្នំ នាថ្ងៃទី១២ ខែឆ្នាំដដែលហើយ លទ្ធផលគឺវិជ្ជមានទាំងពីរនាក់តាយាយ។ ដោយសារស្ថានភាពសុខភាពរបស់ពួកគាត់ធ្ងន់មន្ទីរពេទ្យបង្អែកឯកភ្នំក៏បានបញ្ជូនពួកគាត់មកសម្រាកព្យាបាលនៅមន្ទីរពេទ្យបង្អែកខេត្តបាត់ដំបង។
មានប្រជាពលរដ្ឋនិងសប្បុរសជនជាង១០០នាក់បានផ្ញេីថវិកាចូលរួមមរណទុក្ខ ជាមួយលោកតាដែលគេបានដឹងថា បានជួយថែរក្សាលោកយាយ យ៉ាងដិតដល់មុនពេលលោកយាយទទួលមរណភាព ៕
ដោយ៖ សូរិយា
