សារព័ត៌មាន នគរវត្ត តែងតែនាំមុខគេជានិច្ច
ការប្រកួតបាល់ទាត់សម្រាប់រដូវកាលថ្មី២០២១-២០២២ បានចាប់ផ្តើមឡើងវិញហើយ ដោយមានក្លិបធំៗចំនួន៣បើកការប្រកួតនៅថ្ងៃនេះជាមួយគ្នា។ ក្នុងនោះក្របខ័ណ្ឌអង់គ្លេស Premier League, ក្របខ័ណ្ឌអាល្លឺម៉ង់ Bundesliga និងក្របខ័ណ្ឌអេស្ប៉ាញ La Liga បានប្រកួតក្នុងថ្ងៃសុក្រនេះជាមួយគ្នា។
ក្របខ័ណ្ឌអង់គ្លេស Premier League មាន១គូដែលត្រូវប្រកួតបើកឆាករដូវកាលថ្មីគឺក្រុមម្ចាស់ផ្ទះ Brentford ដែលជាក្រុមទើបឡើងមកថ្មីត្រូវស្វាគមន៍ក្រុមកាំភ្លើងធំ Arsenal នៅវេលាម៉ោង២រំលងអធ្រាត្រឈានចូលថ្ងៃទី១៤ម៉ោងនៅកម្ពុជា។
ក្រុម Brentford ៣ប្រកួតចុងក្រោយក្នុងជំនួបមិត្តភាពគឺស្មើជាមួយក្រុមបិសាចក្រហម Man United ២ទល់២, ចាញ់ក្រុម West Ham United ១ទល់០ និងឈ្នះ Valencia២ទល់១។
ក្រុមកាំភ្លើងធំ Arsenal ៣ប្រកួតចុងក្រោយស្មើជាមួយក្រុម Rangers២ទល់២, ចាញ់ក្រុម Chelsea ២ទល់១ និងចាញ់ក្រុម Tottenham១ទល់០។ ប្រវត្តិជួបគ្នា៦ប្រកួតចុងក្រោយក្រុមកាំភ្លើងធំឈ្នះ៣ដង, Brentford ឈ្នះ២ដង និងស្មើគ្នា១ដង។
ចំណែកការប្រកួតបើកឆាកក្របខ័ណ្ឌអាល្លឺម៉ង់ Bundesliga មាន១គូដែលត្រូវប្រកួតនៅថ្ងៃនេះគឺក្រុមម្ចាស់ផ្ទះ Moncheng ប៉ះជាមួយក្រុមអតីតម្ចាស់ជើងឯក Bayern Munich នៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៤ ខែសីហាម៉ោងកម្ពុជា។ ក្រុម Moncheng ៣ប្រកួតចុងក្រោយឈ្នះក្រុម Bayern Munich ២ទល់០ក្នុងជំនួបមិត្តភាព, ឈ្នះក្រុម Groningen២ទល់១ ក្នុងជំនួបមិត្តភាព និងឈ្នះ Kaiserslautern ១ទល់០ក្នុងការប្រកួតជម្រុះអាល្លឺម៉ង់ Cup ។
រីឯក្រុម Bayern Munich ៣ប្រកួតចុងក្រោយក្នុងជំនួបមិត្តភាពគឺ ស្មើជាមួយក្រុម Ajax ២ទល់២, ចាញ់ក្រុម Moncheng ២ទល់០ និងចាញ់ក្រុម Napoli ៣ទល់០។ ប្រវត្តិជួបគ្នារវាងក្រុម Moncheng នឹងក្រុម Bayern Munich ៦ប្រកួតចុងក្រោយគឺក្រុម Moncheng ឈ្នះ៣ដង និងក្រុម Bayern Munich ឈ្នះ៣ដង។
ដោយឡែកការប្រកួតបើកឆាកនៅលីគកំពូលអេស្ប៉ាញ La Liga វិញមាន១ប្រកួតសម្រាប់ថ្ងៃដំបូងនៃរដូវកាលនេះគឺក្រុមម្ចាស់ផ្ទះ Valencia ប៉ះជាមួយក្រុមភ្ញៀវ Gatafe នៅវេលាម៉ោង២រំលងអធ្រាត្រឈានចូលថ្ងៃទី១៤ សីហា។ ក្រុមម្ចាស់ផ្ទះ Valencia ៣ប្រកួតចុងក្រោយក្នុងជំនួបមិត្តភាពឈ្នះក្រុម Levante ១ទល់០, ឈ្នះក្រុម AC Milan ក្នុងបាល់ប៉េណាល់ទី៥ទល់៣ និងចាញ់ក្រុម Brentford ២ទល់១។
ចំណែកក្រុមភ្ញៀវ Gatafe ៣ប្រកួតចុងក្រោយក្នុងជំនួបមិត្តភាពគឺឈ្នះក្រុម Fuenlabrada ១ទល់០, ឈ្នះក្រុម Real Zaragoza ក្នុងបាល់ប៉េណាល់ទី និងឈ្នះក្រុម Brighton ២ទល់០។ ប្រវត្តិជួបគ្នា៦ប្រកួតចុងក្រោយរវាងក្រុម Valencia នឹង Gatafe គឺក្រុម Valencia ឈ្នះ១ដង, ក្រុម Gatafe ឈ្នះ២ដង និងស្មើគ្នា៣ដង ៕
ដោយ៖ ភារៈ(រូបភាព៖ soccerway)
