សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ កាលពីព្រឹកថ្ងៃទី ៨ខែកញ្ញា ឆ្នាំ២០២១ កម្លាំងនគរបាលខេត្តតាកែវបានចាក់បំផ្លាញចោលទឹកអាល់កុលក្លែងក្លាយ (មេតាណុល) ចំនួន៩៤៤ប៊ីដុង ក្រោយប្រតិបត្តិការបង្ក្រាប និងរឹបអូសដកហូតបាន នៅពីរទីតាំងផ្សេងគ្នា ក្នុងស្រុកគីរីវង់កាលពីថ្ងៃអាទិត្យមុន។
សមត្ថកិច្ចបានឲ្យដឹងថា ការចាក់បំផ្លាញចោលអាល់កុលក្លែងក្លាយនេះធ្វើឡើងក្រោមវត្តមានលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ លោក ខាន់ សុខា អភិបាលរងខេត្តតាកែវ និងមន្ត្រីពាក់ព័ន្ធមួយចំនួនផងដែរ។ ទឹកអាល់កុលក្លែងក្លាយ(មេតាណុល) ដែលបានចាក់បំផ្លាញចោល មានចំនួន៩៤៤ប៊ីដុងស្មើនឹង២៨៣២០លីត្រ បន្ទាប់ពីបង្រ្កាបបានកាលពីថ្ងៃអាទិត្យទី០៥ ខែកញ្ញា ឆ្នាំ២០២១ វេលាម៉ោង១៤និង៣០នាទី។ ការបង្រ្កាបនេះធ្វើឡើងដោយកម្លាំងជំនាញបន្ទាប់ពីបានប្រទះឃើញរ៉ឺម៉កម៉ូតូចំនួន០២គ្រឿង កំពុងដឹកទឹកអាល់កុលក្លែងក្លាយ នៅតាមបណ្តោយផ្លូវជាតិ០២ស្ថិតក្នុងភូមិផ្សារ ឃុំភ្នំដិន ស្រុកគីរីវង់ ខេត្តតាកែវ។ពេលនោះកម្លាំងនគរបាលជំនាញ សហការជាមួយមន្ត្រីសាខាកាំកុងត្រូលប្រចាំខេត្តតាកែវ អាជ្ញាធរពាក់ព័ន្ធ និងមានការសម្របសម្រួលនីតិវិធីពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវផងនោះ ក៏បានឃាត់និងរឹបអូសទឹកអាល់ក្លែងក្លាយ(មេតាណុល)ចំនួនពីរទីតាំងផ្សេងគ្នាដែលមានតំណាងម្ចាស់ទំនិញឈ្មោះ ហុង ស្រី ម៉ាច និងឈ្មោះ ច័ន្ទ សុណា មានចំនួន៩៤៤ប៊ីដុងស្មើនិង២៨៣២០លីត្រយកទៅរក្សាទុក ហើយសម្រេចយកមកចាក់បំផ្លាញចោលក្នុងថ្ងៃនេះតែម្តង៕
ដោយ ៖ ប្រាថ្នា
