សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានចូលរួមពិធីសំណេះសំណាលជាមួយអង្គការសង្គមស៊ីវិល និងបើកយុទ្ធនាការចុះបាញ់ថ្នាំសម្លាប់មេរោគកូវីដ-១៩ ជុំទី៣ នៅតាមបណ្តាក្រុង ស្រុក ក្នុងខេត្តកណ្តាល រួមមាន ក្រុងតាខ្មៅ ស្រុកស្អាង និងស្រុកពញាឮ របស់វេទិកាសម្ព័ន្ធសង្គមស៊ីវិលក្រោមអធិបតីភាព លោក កឹមរ័ត្ន វិសិដ្ឋ រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមប្រឹក្សាភិបាល នៃវេទិកាសង្គមស៊ីវិល ដោយមានការអញ្ជើញចូលរួមពីលោក នូវប៉េង ច័ន្ទតារា និងលោកស្រី ហ៊ុន កុសនី អភិបាលរងខេត្តកណ្តាល នៅសាលប្រជុំសាលា ខេត្តកណ្តាល នាព្រឹកថ្ងៃអង្គារ ៨កើត ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែកញ្ញា ឆ្នាំ២០២១នេះ។
នាឱកាសនោះ លោកអភិបាលខេត្ត សូមថ្លែងអំណរគុណ និងគូសបញ្ជាក់អំពីភាពជាដៃគូ និងតួនាទីដ៏សំខាន់របស់អង្គការសង្គមស៊ីវិល និងសមាគមនានា ក្នុងការចូលរួមចំណែកជាមួយអាជ្ញាធរគ្រប់លំដាប់ថ្នាក់ក្នុងខេត្តកណ្តាល នៅក្នុងការអភិវឌ្ឍមូលដ្ឋាន លើកកម្ពស់ជីវភាពរស់នៅរបស់ប្រជាពលរដ្ឋ កាត់បន្ថយភាពក្រីក្រ ស្របតាមកម្មវិធីនយោបាយ និង យុទ្ធសាស្ត្រចតុកោណរបស់រាជរដ្ឋាភិបាលកម្ពុជា។ សូមថ្លែងអំណរគុណដល់វេទិកាសម្ព័ន្ធអង្គការសង្គមស៊ីវិល ដែលតែងបានផ្ដល់ការឧបត្ថម្ភគាំទ្រដល់រដ្ឋបាលខេត្ត និងបានរួមចំណែកក្នុងយុទ្ធនាការបង្ការ ទប់ស្កាត់ការឆ្លងរាលដាលនៃជំងឺកូវីដ-១៩។
ជាមួយគ្នានេះ លោក កឹមរ័ត្ន វិសិដ្ឋ បានគូសបញ្ជាក់អំពីសារៈសំខាន់របស់អង្គការសង្គមស៊ីវិល និងសមាគមនានា ដែលជាដៃគូដ៏ចាំបាច់មិនអាចខ្វះបានសម្រាប់ការអភិវឌ្ឍសង្គមទាំងមូល។ ឯកឧត្តមបានបញ្ជាក់ទៀតថា អង្គការសង្គមស៊ីវិល និងអាជ្ញាធរសាធារណៈ តែងបាន រួមសហការល្អជាមួយគ្នានាពេលកន្លងមក ដោយបាន បង្កើតនូវសមិទ្ធផលជាច្រើនសម្រាប់ប្រជាពលរដ្ឋក្នុងមូលដ្ឋាន។
នៅក្នុងឱកាសនោះ លោប្រធានក្រុមប្រឹក្សាភិបាលនៃវេទិកាសង្គមស៊ីវិលនៃទីស្តីការគណៈរដ្ឋមន្រ្តី បានផ្តល់នូវ ឱសថចិន ម៉ាស់ ឧបករណ៍តេស្តរហ័ស និងបំពង់បាញ់អាល់កុលជូនដល់អង្គការសមាគមដែលមានវត្តមានក្នុងពិធីសំណេះសំណាលនេះផងដែរ៕
ដោយ៖សហការី
