សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ អភិបាលស្តីទី ស្រុកកំពង់លែង លោក ចេង ចាន់ដូណា នៅព្រឹកថ្ងៃទី២ ខែតុលា ឆ្នាំ២០២១នេះ បានប្រាប់តាមទូរស័ព្ទដោយបញ្ជាក់ថា ផ្លូវ៥០សេ ក្នុងភូមិសាស្រ្ត ឃុំច្រណូក ស្រុកកំពង់លែង ខេត្តកំពង់ឆ្នាំង ដែលមានប្រវែងជាង១៣គីឡូម៉ែត្រ នៅពេលនេះអាជ្ញាធរបានផ្អាកការធ្វើដណើរជាបណ្តោះអាសន្ន ដើម្បីធានាបានសុវត្ថិភាព និង រក្សាគុណភាពផ្លូវ ។
ការផ្អាកជាបណ្តោះអាសន្នចំពោះការធ្វើដំណើរឆ្លងកាត់របស់ប្រជាពលរដ្ឋនាពេលនេះ គឺបន្ទាប់ពីផ្លូវ៥០សេនេះ ត្រូវបានទឹកជំនន់បន្តកើនឡើងខ្ពស់ បណ្តាលឱ្យលិចផ្លូវប្រវែងប្រមាណជាង៥០០ម៉ែត្រ លិចដែលមានកំពស់ប្រមាណជាង២តឹក ។ ហើយដើម្បីរក្សានូវសុវត្ថិភាព និង រងការខូចខាតពីការធ្វើដំណើរឆ្លងកាត់ អាជ្ញាធរស្រុកបានសម្រេចចេញសេចជូនដណឹង កាលពីល្ងាចថ្ងៃទី១ ខែតុលា ឆ្នាំ២០២១ ជាបណ្តោះអាសន្នសិន ។
លោក ចេង ចាន់ដូណា អភិបាលស្តីទីស្រុកកំពង់លែង បានបន្តថា ប្រសិនបើទឹកជំនន់ នៅតែបន្តហក់ឡើងទៀតនោះអាជ្ញាធរស្រុកនឹងបន្តបិទការធ្វើដំណើរតាមរយៈម៉ូតូនិងរថយន្ត រហូតដល់ទឹកជំនន់នេះស្រកវិញ ។
លោក អភិបាលស្តីទីបានសំណូមពរដល់ប្រជាពលរដ្ឋដែលជាអ្នកប្រើប្រាស់ផ្លូវនេះ ចូលរួមអនុវត្តតាមសេចក្តីជូនដំណឹងនេះ និង មេត្តាយោគយល់អធ្យាស្រ័យដល់អាជ្ញាធរស្រុកក្នុងរយៈពេល ក្នុងដំណាក់កាលនេះ ៕
ដោយ ៖ ចន្ថា
