សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ ក្មេងប្រុសម្នាក់ខណៈរត់ឆ្លងផ្លូវត្រូវបានរថយន្តមួយគ្រឿងបុកបណ្តាលឲ្យស្លាប់ កាលពីវេលាម៉ោង១៤និង២០នាទីថ្ងៃទី៩ ខែតុលា ឆ្នាំ២០២១ នៅលើកំណាត់ផ្លូវកៅស៊ូ ចំណុចភូមិគោកចាស់ ឃុំស្រែខ្វាវ ស្រុកអង្គរជុំ ខេត្តសៀមរាប ។
សមត្ថកិច្ចនគរបាលចរាចរណ៍ស្រុកអង្គជុំបានឲ្យដឹង រថយន្តបង្កហេតុម៉ាកហ៊ីយាន់ដាយ ពណ៌ស ពាក់ស្លាកលេខ សៀមរាប 3A-3201បើកបរដោយឈ្មោះ វ៉ឹង វ៉ាត់ ភេទប្រុស អាយុ២១ឆ្នាំ មានទីលំនៅភូមិស្នាយល្អ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ បានបើកបរក្នុងទិសដៅពីលិច ទៅកើត។
លុះមកដល់កន្លែងកើតហេតុរថយន្តនេះបានជ្រុលបុកក្មេងរងគ្រោះកំពុងរត់ឆ្លងផ្លូវឈ្មោះ រឿត សុភា ភេទប្រុស អាយុ៥ឆ្នាំ មានទីលំនៅភូមិគោកចាស់ ឃុំស្រែខ្វាវ ស្រុកអង្គរជុំ ខេត្តសៀមរាប បណ្តាលឲ្យស្លាប់ភ្លាមៗនៅនឹងកន្លែង ។
សមត្ថកិច្ចជំនាញបានឲ្យដឹងថា ករណីគ្រោះថ្នាក់ចរាចរណ៍នេះ គឺបណ្តាលមកពីអ្នកបើកបររថយន្តបើកបរក្នុងល្បឿនលឿន ហើយក្មេងរត់ឆ្លងផ្លូវខ្វះការប្រុងប្រយ័ត្ន ទើបបង្កគ្រោះថ្នាក់បែបនេះ។
ក្រោយកើតហេតុ សមត្ថកិច្ចជំនាញបានចុះវាស់វែង ធ្វើកំណត់ហេតុ និងឃាត់ខ្លួនអ្នកបើកបរ រួមទាំងវត្ថុតាងយកមកអធិការដ្ឋានស្រុកអង្គរជុំ ដើម្បីកសាងសំណុំរឿងតាមនីតិវិធី ។ ចំណែកសាកសពក្មេងរងគ្រោះ សមត្ថកិច្ចបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណីនៅគេហដ្ឋាន ៕
ដោយ ៖ ប្រាថ្នា
