បាញ់ប្រហារនៅរង្គសាលអាមេរិក ស្លាប់និងរបួសជាង១០នាក់

ចែករំលែក៖

នៅថ្ងៃទី១០ ខែតុលា (ពេលវេលានៅអាមេរិក) មានករណីបាញ់ប្រហារកើតឡើងនៅក្នុងរង្គសាលដែលមានមនុស្សច្រើនស្ថិតនៅក្នុងតំបន់ Saint Paul រដ្ឋ Minnesota សហរដ្ឋអាមេរិក បណ្តាលឲ្យមនុស្សម្នាក់ស្លាប់និង១៤នាក់រងរបួសធ្ងន់ ។
តាមសារព័ត៌មាន Insider បានផ្សាយថា នៅវេលាម៉ោង១២និង១៥នាទី ថ្ងៃទី១០ខែតុលា(ពេលវេលានៅអាមេរិក) កម្លាំងប៉ូលិសបានទៅដល់កន្លែងកើតហេតុ ដោយសារស្ថានភាពនៅទីនោះធ្លាក់ក្នុងសភាពចលាចល ។ យ៉ាងហោចណាស់ក៏មានមនុស្ស១៥នាក់រងរបួសដោយត្រូវគ្រាប់កាំភ្លើង ប៉ុន្តែមិនគ្រោះថ្នាក់ដល់ជីវិតនោះទេ និងមានម្នាក់ទៀតស្លាប់។
តាមការលើកឡើងរបស់ស្នងការប៉ូលិសទីក្រុង Saint Paul បានឱ្យដឹងថា ជនរងគ្រោះស្លាប់គឺជាស្ត្រីមានអាយុប្រហែល២០ឆ្នាំ។
អ្នកនាំពាក្យស្នងការប៉ូលិសទីក្រុង Saint Paul លោក Steve Linders បាននិយាយទៅកាន់ក្រុមអ្នកសារព័ត៌មានថា «ខ្ញុំគិតទៅលើស្ត្រីម្នាក់ដែលបានស្លាប់។ កាលពីមួយនាទីមុន នាងបានសប្បាយរីករាយយ៉ាងខ្លាំង ដោយមិននឹកស្មានថា មួយនាទីក្រោយមកនាងត្រូវស្លាប់បែបនេះសោះ»។
ចំណែកអ្នករងរបួសបានបញ្ជូនទៅកាន់មន្ទីរពេទ្យដើម្បីព្យាបាល ដោយសារតែត្រូវគ្រាប់កាំភ្លើង ។ ដោយឡែកជនដៃដល់៣នាក់ដែលរងរបួសក៏បានបញ្ជូនទៅព្យាបាលផងដែរក្រោមការយាមល្បាតយ៉ាងតឹងតែង។ ក្រោយចាកចេញពីមន្ទីរពេទ្យ ជនដៃដល់នឹងត្រូវបញ្ជូនទៅឃុំខ្លួននៅក្នុងពន្ធនាគារ Ramsey ៕