សារព័ត៌មាន នគរវត្ត តែងតែនាំមុខគេជានិច្ច
ក្រុមហង្សក្រហម Liverpool នឹងសម្លឹងរកការការពារការចាប់ផ្តើមដ៏ល្អឥតខ្ចោះរបស់ពួកគេនៅដំណាក់កាលដំបូងនៃក្របខ័ណ្ឌ UEFA Champions League នៅពេលពួកគេធ្វើដំណើរទៅជួបក្រុមម្ចាស់ផ្ទះ Atletico Madrid នៅកីឡដ្ឋាន Estadio Wanda Metropolitano នៅរាត្រីថ្ងៃអង្គារនេះ។
ក្រុម Atletico Madrid ទទួលបានជ័យជម្នះក្នុងការប្រកួតលើកដំបូងនៅរដូវកាលនេះជាមួយនឹងជ័យជម្នះ ២-១ លើក្រុម AC Milan នៅកីឡដ្ឋាន StadioGiuseppe Meazza ក្នុងការប្រកួតវគ្គចែកពូលចុងក្រោយរបស់ពួកគេ។ ខ្សែប្រយុទ្ធ Antoine Griezmann និង Luis Suárez ជាអ្នករកបានគ្រាប់បាល់ជ័យជម្នះនេះ។
ក្រុមហង្សក្រហម Liverpool បានទទួលជ័យជម្នះ ៥-១ លើក្រុម Porto នៅកីឡដ្ឋាន Estádio Do Dragão ក្នុងការប្រកួតវគ្គជម្រុះតាមពូលចុងក្រោយរបស់ពួកគេដោយបន្តមិនស្គាល់ចាញ់សោះក្នុងការប្រកួតទាំងអស់រហូតដល់២០ (ឈ្នះ១៤ និងស្មើ៦) ខ្សែប្រយុទ្ធ Mohamed Salah និង Roberto Firmino បានស៊ុតបាល់បញ្ចូលទី២គ្រាប់ម្នាក់ឯងដើម្បីនាំមុខ។
ហង្សក្រហម Liverpool នាំមុខក្រុមនេះដោយមាន៦ពិន្ទុ ខណៈដែលAtletico Madrid មាន៤ពិន្ទុ ធ្វើឱ្យពួកគេឈរនៅលេខ២។ ចំណែកក្រុមផ្សេងទៀតនៅក្នុងពូលនេះមាន Porto កំពុងឈរនៅលេខ៣ដោយមាន១ពិន្ទុ និង AC Milan ស្ថិតនៅលេខ៤ដោយមានពិន្ទុសូន្យ។
ការប្រកួតលើកមុនរវាងក្រុមទាំង២បានឃើញក្រុម Atlético Madrid ទទួលបានជ័យជម្នះ ៣-២ នៅម៉ោងបន្ថែមក្នុងការប្រកួតវគ្គ១៦ក្រុមនៃក្របខ័ណ្ឌ Champions League នៅកីឡដ្ឋាន Anfield កាលពីខែមីនាឆ្នាំ២០២០។ កីឡាករ Marcos Llorente បានដឹកនាំក្រុម AtleticoMadrid ដោយរកបាន២គ្រាប់ដោយស៊ុតបញ្ចូលទីនៅនាទីទី៩៧ និងនាទីទី១០៦។ កីឡាករ Morata ក៏ស្ថិតនៅក្នុងបញ្ជីឈ្មោះអ្នករកគ្រាប់បាល់បាន ខណៈដែល Georginio Wijnaldum និង Roberto Firmino ក៏បានម្នាក់១គ្រាប់សម្រាប់ហង្សក្រហមដែរ។
ក្រុម Atletico Madrid បានយកឈ្នះក្រុមហង្សក្រហម Liverpool នៅចុងម៉ោងជាមួយនឹងជ័យជម្នះក្នុងការជួបគ្នា៣លើកជាប់ៗគ្នាគិតត្រឹមខែសីហាឆ្នាំ២០១៧ ។
កីឡាករដែលលេចធ្លោជាងគេរបស់ហង្សក្រហមគឺ Salah ដែលបានស៊ុតបាល់បញ្ចូលទី៣គ្រាប់ក្នុងយុទ្ធនាការ Champions League នេះរួមទាំងគ្រាប់បាល់បើកឆាកមួយប្រកួត។ គាត់ជាប់ចំណាត់ថ្នាក់លេខ៤ក្នុងតារាងពិន្ទុការប្រកួតនៅឆ្នាំ២០២១-២០២២ ។ ចំណែកខ្សែប្រយុទ្ធ Suárezនិង Griezmann ក៏ជាកីឡាករសំខាន់សម្រាប់Atletico Madrid ក្នុងការប្រកួត Champions League ផងដែរក្នុងការរកគ្រាប់បាល់ឲ្យក្រុម។
ក្រុមម្ចាស់ផ្ទះ Atletico Madrid បានទទួលលទ្ធផលស្មើក្នុងការប្រកួតក្របខ័ណ្ឌ Champions League លើកមុនរបស់ពួកគេនៅឯកីឡដ្ឋាន EstadioWanda Metropolitano នៅរដូវកាលនេះ។ Atletico ស្ថិតនៅចំកណ្តាលការប្រកួតមិនដែលចាញ់ក្នុងផ្ទះចំនួន១២ប្រកួត (ឈ្នះ៨ និងស្មើ៤) នៅក្នុងការប្រកួតទាំងអស់។
ជ័យជម្នះរបស់ក្រុមហង្សក្រហម Liverpool លើក្រុម Porto គឺជាការប្រកួតតែមួយគត់របស់ពួកគេបានឈ្នះក្នុងការប្រកួតប្រជែងនៅរដូវកាលនេះសម្រាប់ក្រៅទឹកដី។ ក្រុមអង់គ្លេសមួយនេះកំពុងសម្លឹងរកការបន្ថែមការប្រកួតក្រៅដីមិនដែលចាញ់១០ប្រកួត (ឈ្នះ៨ និងស្មើ២)។
នៅក្នុងការប្រកួត៦លើកចុងក្រោយរបស់ពួកគេនៅក្នុងការប្រកួតទាំងអស់ក្រុម Atlético Madrid បានឈ្នះ៣ ស្មើ២ និងចាញ់១ ក្នុងនោះរកបាន៦គ្រាប់ និងរបូតគ្រាប់បាល់៣គ្រាប់។ ចំណែកក្រុមហង្សក្រហម Liverpool បានឈ្នះ៤លើក និងស្មើ២ លើកក្នុងការប្រកួត៦លើកចុងក្រោយរបស់ពួកគេ ក្នុងនោះស៊ុតបញ្ចូលទីបាន២១គ្រាប់ និងរបូតវិញ៦គ្រាប់ ៕
ដោយ៖ ភារៈ(រូបភាព ៖ soccerway.com)
