សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ មន្ត្រីឧទ្យានុរក្សនៃការិយាល័យដែនជម្រកសត្វព្រៃស្រែពក ប្រចាំស្នាក់ការល្វេ និងស្នាក់ការម្រើច នៅថ្ងៃអង្គារទី២៦ ខែតុលា ឆ្នាំ២០២១នេះ បានឱ្យដឹងថា ក្រុមមន្រ្តីឧទ្យានុរក្សបានធ្វើការដោះលែងសត្វត្រកួតចំនួន១៨ក្បាលឱ្យចូលទៅក្នុងព្រៃមានសេរីភាពវិញ ខណៈរំដោះបានពីព្រានព្រៃ។ប្រភពដដែលបន្តថា មន្រ្តីឧទ្យានុរក្ស សហការជាមួយកម្លាំងសមត្ថកិច្ចចុះធ្វើការល្បាតតាមដងទន្លេ កាលពីថ្ងៃទី២៤ ខែតុលា ឆ្នាំ២០២១ លុះមកដល់ត្រង់ចំណុចពាមអូរឌឿ ស្ថិតនៅភូមិកោះម្យើលលើ ឃុំណងឃីលឹក ស្រុកកោះញែក ខេត្តមណ្ឌលគិរី ក៏ប្រទះឃើញជនសង្ស័យចាប់សត្វព្រៃបំណងចង់យកចេញពីព្រៃ ទេីបកម្លាំងជំនាញដេញចាប់តាមដងទន្លេស្រែពក។ ភ្លាមនោះជនសង្ស័យភ័យក៏ទម្លាក់សត្វត្រកួតចោលរួចរត់គេចខ្លួនបាត់ ដោយបន្សល់ទុកសត្វត្រកួតចំនួន១៨ក្បាល។
គូរបញ្ជាក់ថា បច្ចុប្បន្ននេះយេីងសង្កេតឃេីញថា កិច្ចខិតខំប្រឹងប្រែងរបស់អភិរក្សសត្វព្រៃ ក្រសួងបរិស្ថាន និងអង្គការដៃគូ រួមនឹងសមាជិកសហគមន៍តំបន់ការពារធម្មជាតិ ជាប្រយោជន៍ដ៏សំខាន់ក្នុងការការពារថែរក្សាធនធានធម្មជាតិ ជាពិសេសសត្វព្រៃដែលកម្រនិងជិតផុតពូជ៕
ដោយ៖សហការី
