សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យពីរនាក់បានធ្វើសកម្មភាពឆក់កាបូបពីស្ត្រីម្នាក់បានសម្រេចរួចជិះម៉ូតូគេចខ្លួនបាត់ស្រមោល ចំណែកជនរងគ្រោះព្យាយាមជិះម៉ូតូដេញតាមពីក្រោយបណ្ដាលឲ្យជ្រុលទៅបុកនឹងគ្រឿងសំណង់ដែលដាក់តាំងលក់តាមផ្លូវដួលរងរបួសឈាមស្រោចពេញខ្លួន។
ហេតុការណ៍នេះបានកើតឡើងកាលពីវេលាម៉ោង១ និង៥០ នាទីរសៀលថ្ងៃទី១៤ ខែវិច្ឆិកាឆ្នាំ២០២១ ដែលស្ថិតនៅក្នុងភូមិតិក្ខប្បញ្ញោ ក្នុងបុរីឈូកវ៉ា២ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីជនរងគ្រោះបានឲ្យដឹងថាមុនពេលកើតហេតុរូបគាត់បានជិះម៉ូតូមួយគ្រឿងម៉ាកធូដេពណ៌ក្រហមពាក់ស្លាកលេខភ្នំពេញ 1CE 6539ជិះតែម្នាក់ឯងធ្វើដំណើរតាមបណ្ដោយផ្លូវបេតុងក្នុងបុរីឈូកវ៉ា២ ក្នុងទិសដៅពីត្បូងទៅជើងក្នុងគោលបំណងទៅផ្សារដើម្បីរកទិញអីវ៉ាន់ ខណៈដែលធ្វើដំណើរដល់ផ្លូវបំបែកជាបួនក្នុងបុរីឈូកវ៉ា២ ស្រាប់តែមានជនសង្ស័យមានគ្នាពីរនាក់ជិះម៉ូតូមួយគ្រឿងម៉ាកសង់សេ125 មិនចាំស្លាកលេខបានមកពីក្រោយរួចធ្វើសកម្មភាពឆក់កាបូបរបស់គាត់បានសម្រេច ហើយបានជិះម៉ូតូរត់គេចខ្លួនបាត់ស្រមោល ភ្លាមៗនោះរូបគាត់ក៏បានជិះម៉ូតូដេញតាមពីក្រោយ ដោយបានស្រែកថាចោរៗដើម្បីឱ្យប្រជាពលរដ្ឋជួយតាមចាប់ជនសង្ស័យ ខណៈដែលជនរងគ្រោះបានជិះម៉ូតូដេញតាមជនសង្ស័យក៏បានជ្រុលម៉ូតូទៅបុកនឹងគ្រឿងសំណង់ដែលដាក់តាំងលក់នៅតាមបណ្ដោយផ្លូវលេខលេខ២០ ដែលស្ថិតនៅក្នុងបុរីឈូកវ៉ា២ បណ្តាលឲ្យដួលរងរបួសហូរឈាមស្រោចពេញខ្លួន រួចក៏បានទំនាក់ទំនងទៅសមត្ថកិច្ចមូលដ្ឋានដើម្បីជួយធ្វើអន្តរាគមន៍។ ជនរងគ្រោះបានបន្តឲ្យដឹងថាសម្ភារៈដែលបាត់បង់នោះរួមមានទូរស័ព្ទ iphone ចំនួនមួយគ្រឿង លុយចំនួន៥០០ដុល្លារ អត្តសញ្ញាណប័ណ្ណ ១សន្លឹក រួមទាំងសម្ភារៈមួយចំនួនទៀតដែលនៅក្នុងកាបូបនោះ។
ក្រោយកើតហេតុសមត្ថកិច្ចមូលដ្ឋានបានមកដល់រួចបានឱ្យជនរងគ្រោះទៅមន្ទីរពេទ្យដើម្បីលាងរបួស រួចរាល់ហើយចាំមកដាក់ពាក្យបណ្ដឹងដើម្បីឲ្យសមត្ថកិច្ចស្វែងរកជនសង្ស័យមកផ្តន្ទាទោសតាមផ្លូវច្បាប់ ៕
ដោយ៖និនសុភ័ស្ត
