សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកគាំទ្រវិស័យកញ្ញាឯកមានការចាប់អារម្មណ៍ខ្លាំងក្រោយពីមានការលើកឡើងក្នុងវិស័យកញ្ញាឯកថា កីឡាការិនីហែលទឹកកញ្ញា ហែមថុន វិទិនី និងគូស្នេហ៍អ្នកចាំទី Alex You ត្រៀមចូលប្រកួតកម្មវិធីសម្រស់ទាំង២នាក់តែម្តង។ ការលើកឡើងនេះកំពុងតែផុសផុលក្រោយពីអ្នកទាំងពីរបានបង្ហាញរូបថតបែបបង្ហាញម៉ូតសិចស៊ីមួយចំនួនផងដែរ។
ទោះជាយ៉ាងណាថា Alex You កើតនៅថ្ងៃទី ៨ ខែ មីនា ឆ្នាំ ១៩៩៤ នៅ ភូមិ ត្រពាំងត្នោត ឃុំ សូរ្យសែន ស្រុក ព្រៃឈរ ខេត្ត កំពង់ចាម។លោក គឺជា អតីតអ្នកចាំទីដៃទី១ របស់ក្លឹបភ្នំពេញក្រោនកាលអំឡុងឆ្នាំ ២០១៨ហើយលោកពិតជាមានរូបរាងសង្ហា សមត្ថភាព ទេពកោសល្យខ្ពស់លើការងារសិល្បៈថែមទៀតផង។ ខណៈដែល ហែមថុន វិទិនី ត្រូវបានគេស្គាល់ដែរថា នាងកើតនៅថ្ងៃទី៧ តុលា ឆ្នាំ១៩៩៣ នៅសង្កាត់វាលវង់ ខណ្ឌ៧មករា រាជធានីភ្នំពេញ ។ នាងគឺជាកីឡាការិនីហែលទឹកល្បីឈ្មោះរបស់កម្ពុជា និងធ្លាប់បានចូលរួមប្រកួតនៅក្រៅប្រទេសជាច្រើនលើករួចមកហើយដែរ។ នាងត្រូវបានគេចាប់អារម្មណ៍ខ្លាំងនៅលើរូបសម្រស់ស្រស់សោភា ជាមួយរាងកាយស្វាហាប់ រឹងមាំ និងជាពិធីការិនី និងតារាបង្ហាញម៉ូតថែមទៀតផងដូចនេះនាងមិនពិបាកឡើយក្នុងការទាក់ទាញបានការចាប់អារម្មណ៍ខ្លាំងពីទស្សនិកជន ។ កាន់តែពិសេសនាងនិងគូស្នេហ៍បានធ្វើឲ្យគេចាប់ភ្លឹកមិនតិចនោះទេក្រោយពីបានប្រកាសចំណងស្នេហាជាសាធារណៈជាមួយគ្នានោះ។
ពីគណនីយហ្វេសប៊ុក ដែលគាំទ្រវិស័យកញ្ញាឯកមួយមានឈ្មោះថា Pageant Supporter បានប្រកាសអំពីដំណឹងថ្មីមួយស្តីអំពីកីឡាករបាល់ទាត់ និងជាអ្នកចាំទីកូនកាត់ខ្មែរអាមេរិកកាំងល្បីឈ្មោះ លោក Alex Youនិងចូលរួមប្រកួតក្នុងកម្មវិធីសម្រស់ផ្នែកបុរសមួយ ខណៈដែលកីឡាការិនីហែលទឹកស្រស់សោភា កញ្ញា ហែមថុន វិទិនី ដែលជាគូស្នេហ៍ ក៏នឹងចូលរួមប្រកួក្នុងកម្មវិធីសម្រស់កញ្ញាឯកមួយផងដែរ។ ប្រភពថា៖លេចលឺដំណឹងថា គូរស្នេហ៍ កីឡាករបាល់ទាត់ លោក Alex You និងកីឡាការិនីហែលទឹកជម្រើសជាតិកម្ពុជា កញ្ញា Vitiny Hemthon នឹងកាន់ដៃគ្នាចូលរួមប្រកួតកម្មវិធីសម្រស់ថ្នាក់ជាតិ គឺ Mister Supranational Cambodia 2022 និង Miss Universe Cambodia 2022។
ប្រសិនបើពួកគាត់ទាំងពីរនាក់ចូលប្រកួត តើមានអ្នកគាំទ្រទេ ? មានការសាទរជាខ្លាំងចំពោះដំណឹងដ៏រីករាយមួយនេះ។ សាទរក៏ព្រោះតែកីឡាករ កីឡាការិនី ទាំងពីររូបមិនត្រឹមតែមានសមត្ថភាព កេរ្ដិ៍ឈ្មោះល្បី មានចំណេះដឹង និងរូបសម្រស់ស្រស់សោភា និងស្រស់សង្ហា រហូតអ្នកខ្លះលើកឡើងថាពួកគេពិតជាសាកសមជាម្ចាស់តំណែងបុរសឯកកញ្ញាឯក តំណាងឲ្យប្រទេចូលរួមប្រកួតលើឆាកអន្តរជាតិថែមទៀតផង។ នៅមិនទាន់អាចស្វែងរកការបញ្ជាក់បន្ថែមពីកីឡាករទាំងពីររូបខាងលើបាននៅឡើយទេ។
ទោះជាយ៉ាងណានេះគ្រាន់តែជាដំណឹងក្រៅផ្លូវការប៉ុន្តែសម្រាប់ការចូលរួមប្រកួតមែនឬយ៉ាងត្រូវរង់ចាំតាមដានបន្តទៀត ខណៈដែលកន្លងទៅក្រៅពីកីឡាករ ក៏មានសិល្បករសិល្បការិនីមួយចំនួនទៀតដែលមានទាំងរូបសម្រស់សមត្ថភាពទេពកោលស្យចំណេះដឹង និងរូបសម្រស់ត្រូវបានអ្នកគាំទ្រខ្លួនស្នើឲ្យដាក់ពាក្យចូលរួមប្រកួតលើកម្មវិធីសម្រស់ព្រោះតែពួកគេយល់ថាអាយដលរបស់ខ្លួនពិតជាសក្ដិសមទៅនឹងតំណែងម្ចាស់មកុដ ឬម្ចាស់ជ័យលាភីតំណាងឲ្យកម្ពុជាចូលរួមប្រកួតលើឆាកអន្តរជាតិ ៕
ដោយ ៖ វឌ្ឍនា
