សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង+ខេត្តកំពង់ធំ ៖ សូមបញ្ជាក់ថា, ក្រោយទទួលបានបទបញ្ជាដ៏ខ្ពង់ខ្ពស់ផ្ទាល់ពីសម្តេចតេជោ ភ្លាម លោក ជា សុផារ៉ា ចុះបំពេញបេសកកម្មនៅខេត្តកំពង់ឆ្នាំងជាបន្ទាន់ ក្នុងគោលបំណងចូលរួមបើកយុទ្ធនាការបង្ក្រាប និងទប់ស្កាត់ចលនាកាប់ទន្រ្ទាន ឈូសឆាយដីព្រៃលិចទឹក និងកាន់កាប់ដីខុសច្បាប់ នៅខេត្តកំពង់ឆ្នាំង និងខេត្តកំពង់ធំ ដើម្បីស្រាវរកជនរំលោភយកដីព្រៃលិចទឹក បឹងទន្លេសាប ។
សូមរម្លឹកថា, ដោយទទួលបានបទបញ្ជាដ៏ខ្ពង់ខ្ពស់ផ្ទាល់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃចន្ទ ១០រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២៩ ខែវិច្ឆិកា ឆ្នាំ២០២១ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញមកបំពេញបេសកកម្មនៅខេត្តកំពង់ឆ្នាំងជាបន្ទាន់ ក្នុងគោលបំណងចូលរួមបើកយុទ្ធនាការបង្ក្រាប និងទប់ស្កាត់ចលនាកាប់ទន្រ្ទាន ឈូសឆាយដីព្រៃលិចទឹក និងកាន់កាប់ដីខុសច្បាប់ ដែលដឹកនាំដោយលោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងដែនដី នគរូបនីយកម្ម និងសំណង់ រួមជាមួយក្រុមការងារអន្តរក្រសួង អភិបាលនៃគណៈអភិបាលខេត្ត និងមន្រ្តីពាក់ព័ន្ធជុំវិញខេត្ត។
សូមបញ្ជាក់ថា, ការចុះបំពេញបេសកកម្មនៅខេត្តកំពង់ឆ្នាំងជាបន្ទាន់ ក្នុងគោលបំណងចូលរួមបើកយុទ្ធនាការបង្ក្រាប និងទប់ស្កាត់ចលនាកាប់ទន្រ្ទាន ឈូសឆាយដីព្រៃលិចទឹក និងកាន់កាប់ដីខុសច្បាប់នេះ ជាបេសកកម្ម ដែលត្រូវប្រើកណ្តាប់ដៃដែក វែករកឃើញមុខ មន្ត្រី ថ្នាក់ដឹកនាំ ទាំងកម្លាំងប្រដាប់ ជនស៊ីវិល ទោះថ្នាក់កម្រិតណាក៏ដោយ គឺប្រឈមមុខច្បាប់ តាមបញ្ជាសម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រ ។
ចាំមើលអតីតកាលអភិបាលខេត្តកំពង់ឆ្នាំង ទើបនឹងចេញទៅកាន់ជាអនុរដ្ឋលេខាធិការក្រសួងមហាផ្ទៃ អាចពាក់ព័ន្ធរំលោភយកដីព្រៃលិចទឹកប្រមាណជា២០០០ហិតានោះមែន ឬអត់ !
សម្តេចបញ្ជាក់ថា «បើសិនរបាយការណ៍(រាជបណ្ឌិត្យសភា) នេះខុស ក៏ខ្ញុំសូមអធ្យាស្រ័យ ឮថាអតីតអភិបាលខេត្តដែលទើបចាកចេញមុននេះ បានកាប់បំផ្លាញយកដីប្រមាណជា២ពាន់ហិកតាឯនោះ ដូច្នេះខ្ញុំមិនខ្វល់ថា វាជាដីរបស់អតីតអភិបាលខេត្ត ដែលបច្ចុប្បន្នជាអនុរដ្ឋលេខាធិការក្រសួងមហាផ្ទៃទេ ទោះបីថ្នាក់ណាក៏ដោយ ត្រូវតែប្រមូលយកមកវិញឱ្យអស់ ហើយដីនោះត្រូវតែជាកម្មវត្ថុនៃការដាំដើមឈើឡើងវិញនៅពេលក្រោយ»។ សម្តេចតេជោ ហ៊ុន សែន ផ្ញើរសារ បញ្ជាឲ្យទប់ស្កាត់ និងបង្រ្កាបជាបន្ទាន់ចំពោះការកាប់ព្រៃលិចទឹក និងវាទទីយកដីបឹងទន្លេសាប ជាពិសេសនៅខេត្តកំពង់ឆ្នាំង ! ។
មជ្ឈដ្ឋានទូទៅរបស់ប្រជាពលរដ្ឋ , សូមអរគុណលោកបណ្ឌិត សុខ ទូច ដែលបានចុះស្រាវជ្រាវ និងរាយការណ៍ជូនសម្តេចតេជោ ដេីម្បីសង្គ្រោះដីបឹងទន្លេសាប។
មិនដឹងការស្រាវជ្រាវ និងក្តីរាយការណ៍របស់លោករឿងបឹងទន្លេសាប នឹងរងការប្រឈម ឬអ្នកគុំកួនលោកយ៉ាងណាទេ?
មនុស្សខ្មែរយេីងមិនដឹងថាស្រេកឃ្លានការមានបានជាមួយការបំផ្លាញ់សម្បត្តិធម្មជាតិដល់ពេលណា? ដីព្រៃលិចទឹកជុំវិញបឹងទន្លេសាប គឺចាំបាច់ណាស់ជាជម្រកត្រីពងកូននារដូវវស្សា។
សូមលោកបន្តបេសកកម្មជួយសម្តេចតេជោ ហ៊ុន សែន ដេីម្បីបុព្វហេតុជាតិមាតុភូមិ និងសូមបានទទួលសុខសុវត្ថិភាព ជោគជ័យគ្រប់បេសកកម្ម៕
ដោយ៖សុខ ខេមរា
