សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងរ បន្ទាប់ពីជិះម៉ូតូឌុបប្រពន្ធកូន២នាក់អក់ស័រនិងម៉ូតូមួយគ្រឿងទៀតមិនទាន់ប៉ះគ្នាផង ត្រូវជនដៃដល់ម្នាក់ខឹងដកកាំភ្លេីងខ្លីបាញ់ចំនួន៣គ្រាប់ទាំងប្រពន្ធនិងកូននៅក្បែរ បង្កការភ្ញាក់ផ្អេីលជាខ្លាំងនៅវេលាម៉ោង១០យប់ថ្ងៃទី១៦ខែធ្នូឆ្នាំ២០២១ ចំណុចស្តុបអតីតស្ពានដែកចំការដូង តាមបណ្ដោយផ្លូវ៣៧១ កែងផ្លូវ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
បុរសរងគ្រោះមានឈ្មោះ ឡាយ សៀកឡេង អាយុ៣២ឆ្នាំ ស្នាក់នៅផ្ទះលេខ៣៥៧ ផ្លូវជាតិលេខ៥ ភូមិមិត្តភាព សង្កាត់ឬស្សីកែវ ខណ្ឌឬស្សីកែវ ។ រីឯប្រពន្ធនិងកូន២នាក់ទៀតមិនស្គាល់អត្តសញ្ញាណនោះទេ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុនោះគឺ គេឃេីញបុរសជាជនរងគ្រោះបានជិះម៉ូតូមួយគ្រឿងម៉ាក ហុងដាស្គូពី ពណ៌ខៀវ ពាក់ស្លាកលេខភ្នំពេញ 1IV-5692 បានដឹកប្រពន្ធនិងកូន២នាក់ធ្វេីដំណេីរតាមបណ្ដោយផ្លូវ៣៧១ ទិសដៅពីកេីតមកលិច ខណៈមកដល់ស្តុបត្រង់ចំណុចកេីតហេតុស្រាប់តែមានបុរសម្នាក់ជាជនដៃដល់ ជិះម៉ូតូមួយគ្រឿងម៉ាក ហុងដាស្គូពី ពណ៌ស ពាក់ស្លាកលេខភ្នំពេញ 1GU-9897 ធ្វេីដំណេីរតាមបណ្ដោយផ្លូវ២១៧ ទិសដៅពីជេីងមកត្បូងនិងបំណងបត់ទៅផ្លូវ៣៧១វិញ ក៏ស្រាប់តែអក់ស័រគ្នាបន្តិច តែមិនបានបុក ឬប៉ះគ្នានោះទេ ។
ប្រភពដដែលបានបន្តថា ក្នុងអំឡុងពេលនោះក៏មានការប៉ះសម្ដីគ្នាបន្តិចបន្តួចផងដែរ ទេីបធ្វេីឲ្យជនដៃដល់ដកកាំភ្លេីងខ្លីបាញ់ទៅលេីបុរសម្នាក់ទាំងប្រពន្ធកូននៅក្បែរចំនួន៣គ្រាប់ចំ ពោះ និងដៃ រងរបួសយ៉ាងធ្ងន់ធ្ងរ ។ ភ្លាមៗជនដៃដល់បានជិះម៉ូតូគេចចេញពីកន្លែងកេីតហេតុដល់ផ្លូវបេតុង ក្នុងបុរីលឹមឈាងហាក់ នៃសង្កាត់ស្ទឹងមានជ័យទី៣ ខណ្ឌមានជ័យ ទេីបទុកម៉ូតូចោលគេចខ្លួនបាត់ស្រមោល ។
ក្រោយកេីតហេតុ ជនរងគ្រោះដែលត្រូវគ្រាប់កាំភ្លេីងរងរបួសធ្ងន់នោះ ត្រូវបានរថយន្តសាមុយដឹងយកទៅសង្គ្រោះអាយុជីវិតភ្លាមៗផងដែរ ។ បន្ទាប់មកសមត្ថកិច្ចមូលដ្ឋាន និងផ្នែកជំនាញបានចុះមកប្រមូលវត្ថុតាងដែលពាក់ព័ន្ធយកទៅរក្សាទុក ដេីម្បីធ្វេីការស្រាវជ្រាវតាមចាប់ជនដៃដល់យកមកផ្ដន្ទាទោសតាមច្បាប់ឲ្យខានតែបាន ៕
ដោយ ៖ ភារ៉ា ដង្កោ
