សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៉ីម៉ាក់) បានបង្ហោះសារនៅលេីបណ្ដាញសង្គមហ្វេសប៊ុកផ្ទាល់ខ្លួន នៅព្រឹកថ្ងៃអង្គារទី០៣ ខែមករា ឆ្នាំ២០២២នេះយ៉ាងដូច្នេះថា៖ មកដឹងពីមូលហេតុលោកនាយឧត្តមសេនីយ៍ ហ៉ឹម យ៉ាន់ លេីកម្រាមដៃទាំង៥បង្ហាញនៅពេលពិភាក្សាជាមួយខ្ញុំនៅវិមានឈ្នះ-ឈ្នះ!
នៅក្នុងសំណេរហ្វេសប៊ុករបស់លោក ហេង រតនា បានបញ្ជាក់ទៀតថា តាមពិតលោកនាយឧត្តមសេនីយ៍ នៅពេលឃេីញការតាំងបង្ហាញអំពីប្រភេទគ្រាប់មីនតោននិងចំការមីន ធ្វេីឱ្យឯ.ឧនាយឧត្តមសេនីយ៍រំលឹកនឹកឃេីញពីកំរងអនុស្សាវរីយ៍ដ៍រន្ធត់បំផុតមួយនៃជីវិតរបស់គាត់! ។ លោកនាយឧត្តមសេនីយ៍ បានថយទៅអង្គុយនៅក្បែរជញ្ជាំងចម្លាក់នៃផ្នែកជាន់ផ្ទាល់ដីនៃវិមានឈ្នះ-ឈ្នះ ដោយទឹកមុខស្រងូតស្រងាត់បំផុត ហេីយយេីងក៏បបួលគាត់សន្ទនា!
ការលេីកម្រាមដៃប្រាំនោះ លោកនាយឧត្តមសេនីយ៍ ហ៉ឹម យ៉ាន់ បានបញ្ជាក់ថា ក្នុងសម័យសង្គ្រាម ហេីយក្នុងដំណេីរទៅសមរភូមិមុខម្តងនោះ តាមផ្លូវពីខេត្តកំពង់ធំទៅខេត្តព្រះវិហារ រថយន្តរបស់លោកមានកម្លាំង ៥នាក់ត្រូវបានពួកខែ្មរក្រហមពួកស្ទាក់វាយប្រហារដោយដាក់គ្រាប់មីនតោននិងបាញ់ប្រហារសង្គ្រប់សម្លាប់តែម្តង! រថយន្តរបស់លោកពេលនោះជាន់មីនតោនផ្ទុះយ៉ាងខ្លាំង តែជាសំណាងធំណាស់ ដែលជាន់គ្រាប់មីនតោនផ្ទុះនោះ ធ្វេីឱ្យអ្នកបេីកបរបាក់ជេីងម្ខាងរីឯបួននាក់ទៀតរងរបួសស្រាលៗប៉ុណ្ណោះ នៅពេលគ្រាប់មីនផ្ទុះឡេីងជាមួយសំឡេងយ៉ាងខ្លាំង ផ្សែងនិងធូលីងងឹតដូចយប់ កម្លាំងខែ្មរក្រហមដែលពួនស្ទាក់នោះក៏បានបាញ់សន្ធាប់ដោយកាំភ្លេីងប៊េ៤០ផង និងកាំភ្លេីងស្វ័យប្រវត្តិផ្សេងៗផង ធ្វេីឱ្យលោកមានកម្លាំងតែ ៥នាក់ដោយម្នាក់កំពុងរងរបួសផងនោះ ប្រយុទ្ធបាញ់តតាំងគ្នាអស់រយៈពេលជាងកន្លះម៉ោង ទេីបកម្លាំងកងទ័ពចល័តមកជួយប្រយុទ្ធបណ្តេញពួកខែ្មរក្រហមទាំងនោះបានជោគជ័យ។
បន្ថែមពីនេះ អគ្គនាយកស៊ីម៉ាក់រូបនេះ បានសង្កត់ធ្ងន់ថា នេះជាព្រឹតិ្តការណ៍ដ៍រន្ធត់មួយនៃជីវិតរបស់លោកនាយឧត្តមសេនីយ៍ ហ៉ឹម យ៉ាន់ និងអត្ថន័យលេីកម្រាមដៃ ៥បង្ហាញខ្ញុំនៅពេលនោះ! សូមក្មួយៗយុវជនស្វែងយល់និងសិក្សាបន្ថែមចំពោះរឿងរ៉ាវកំរិតជាតិ អង្គភាព សហគមន៍ និងបុគ្គលម្នាក់ៗ ដេីម្បីដឹងច្បាស់ពីមរតកសង្គ្រាម! ៕
ដោយ៖ស តារា
