សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បន្ទាប់ពីមានករណីជនសង្ស័យជិះម៉ូតូធ្វើសកម្មភាពឆក់កាបូបបណ្ដាលឱ្យស្ដ្រីម្នាក់ដួលរងរបួសធ្ងន់ធ្ងររហូតបាត់បង់ជីវិតពេលដឹកដល់មន្ទីរពេទ្យ កាលពីថ្ងៃទី១៥ ខែមករា ឆ្នាំ២០២២ វេលាម៉ោង១៣ និង៣០នាទីរសៀល ស្ថិតនៅតាមបណ្ដោយផ្លូវសហព័ន្ធរុស្ស៊ីក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ។
ភ្លាមៗក្រោមការដឹកនាំពី លោកឧត្តមសេនីយ៍ឯក ស ថេត អគ្គស្នងការរងនិងជាស្នងការនគរបាលរាជធានីភ្នំពេញ លោកវរសេនីយ៍ឯក ម៉ន វុធី អធិការនៃអធិការដ្ឋាននគរបាលខណ្ឌពោធិ៍សែនជ័យ បានដឹកនាំកងកម្លាំងចំណុះឱ្យអធិការខណ្ឌចុះស្រាវជ្រាវតាមមុខសញ្ញា។ រហូតមកដល់យប់ថ្ងៃទី២៨ ឈានចូលថ្ងៃទី២៩ ខែមករា ឆ្នាំ២០២២ វេលាម៉ោង០១៖៤០នាទី រំលងអធ្រាត្រ កម្លាំងនគរបាលនៃអធិការដ្ឋាននគរបាលខណ្ឌពោធិ៍សែនជ័យបានឃាត់ខ្លួនជនសង្ស័យឈ្មោះ ជុំ សុខបញ្ញា ភេទប្រុសអាយុ១៨ឆ្នាំ មុខរបរសិស្ស ស្នាក់នៅភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ។
ចំណែកឯជនរងគ្រោះឈ្មោះ អ៊ុក កន្និកា ភេទស្រីអាយុ ៤០ឆ្នាំ មុខរបរលក់ដូរ ស្នាក់នៅភូមិត្រពាំងពោធិ៍សង្កាត់ចោមចៅទី៣ខណ្ឌពោធិ៍សែនជ័យរាជធានីភ្នំពេញ។
គួរបញ្ជាក់ថា បច្ចុប្បន្នកម្លាំងនគរបាលជំនាញកំពុងសាកសួរដេីម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់៕
ដោយ៖ស តារា
