សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដែលទើបនឹងលេចមុខក្នុងការងារសិល្បៈក្នុងរយៈពេលចុងក្រោយ និងទទួលបានការពេញចិត្តច្រើនពីអ្នកគាំទ្រតារាសម្តែងស្រស់សង្ហា លោក ខេមរាបុត្រ ស្រាប់តែបង្ហាញមុខក្នុងការប្រកួតកម្មវិធីសម្រស់ផ្នែកបុរសមួយគឺកម្មវិធី Mister Supranational Cambodia។
កម្មវិធីនេះនឹងចាប់ផ្តើមក្នុងពេលដ៏ខ្លីខាងមុខនេះ ស្របពេលដែលបេក្ខភាពកំលោះសង្ហាជាច្រើនរូបបានបង្ហាញវត្តមានក្នុងកម្មវិធីប្រកួតនេះជាបណ្តើរៗហើយនោះ ក្នុងនោះក៏មានវត្តមានលោក ខេមរាបុត្រដែលគេដឹងថាលោកអាចនឹងទាក់ទាញការចាប់អារម្មណ៍បានច្រើនពីកម្មវិធីប្រកួតមួយនេះព្រោះតាំងសមត្ថភាពសិល្បៈគឺលោកមានគ្រប់គ្រាន់ ខណៈដែលការប្រើប្រាស់ភាសាវិញគឺលោកអាចប្រើជាផ្លូវការបានទាំងភាសាអង់គ្លេស និងភាសាថៃ ។ តារាសម្តែងវ័យ២៤ ឆ្នាំរូបនេះក៏មានកម្ពស់យ៉ាងស័ក្កិសមដែរគឺកំពស់១,៨២ម៉ែត្រ និងមានស្រុកកំណើតចេញពី ភូមិតាកយ ឃុំព្រែកដំបូក ស្រុកស្រីសន្ធរ ខេត្តកំពង់ចាម។ បច្ចុប្បន្នលោកគឺ ជានិស្សិតឆ្នាំទី២ផ្នែកភាសាអង់គ្លេសនៃវិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញ ។
គួរបញ្ជាក់ដែរថាកម្មវិធីប្រកួតសម្រស់ទ្រង់ទ្រាយធំ Mister Supranational Cambodia លើកដំបូងនៅកម្ពុជាត្រូវបានប្រកាសជ្រើសរើសបេក្ខភាពឲ្យចូលរួមប្រកួតជាច្រើន ខណៈដែលកម្មវិធីMiss Supranational Cambodia ដំបូងគេត្រូវបានប្រកាសជ័យលាភីហើយគឺកញ្ញាអ៊ិន លក្ខិណា ដែលគេដឹងថាជាបេក្ខភាព1st Runner Up នៃកម្មវិធីប្រកួតMiss Grand Cambodia 2021នោះ ហើយកម្មវិធីនេះត្រូវបានរៀបចំប្រកួតដោយផលិតកម្មមហាហង្ស។ ម្ចាស់ជ័យលាភីទាំងពីរកម្មវិធីនឹងក្លាយជាបេក្ខភាពតំណាងឲ្យកម្ពុជាដំបូងគេក្នុងការចេញទៅប្រកួតនៅលើឆាកអន្តរជាតិ គឺកម្មវិធីMiss Mister Supranational2022នៅលើឆាកអន្តរជាតិនាពេលខាងមុខនេះ៕
ដោយ ៖ វឌ្ឍនា
