សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ធ្វើឲ្យទស្សនិកជនភ្ញាក់ផ្អើលនឹងសាទរកាលពីរសៀលថ្ងៃទី ១៧ ខែកុម្ភៈ ឆ្នាំ ២០២២ នេះ ក្រោយពីគេទទួលបានដំណឹងថាលោក ខេមរៈ សិរីមន្ត ត្រូវបានព្រះមហាក្សត្រនៃព្រះរាជាណាចក្រកម្ពុជា ត្រាស់បង្គាប់ផ្តល់គោរមងារ ជាឧកញ៉ា ។ នេះបើយោងតាមលិខិត មានសេចក្តីក្រាបបង្គំទូលថ្វាយរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា។ ព្រះរាជក្រិត្យ ត្រាស់បង្គាប់ ផ្តល់គោរមងារ លោក ខែម ប៊ុន ថៃ ជា ឧកញ៉ា ធ្វើនៅថ្ងៃទី ១១ ខែកុម្ភៈ ឆ្នាំ ២០២២ ឡាយព្រះហស្តលេខាដោយព្រះមហាក្សត្រសម្តេចព្រះបរមនាថ នរោត្តម សីហមុនី ហើយបានចម្លងត្រឹមត្រូវតាមច្បាប់ដើមដោយ ឧបនាយករដ្ឋមន្រ្តី ប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី កិត្តិនីតិកោសលបណ្ឌិត ប៊ិន ឈិន ។
គេចាំបានផងដែរថា មួយរយៈចុងក្រោយនេះគេតែងតែសង្កេតឃើញលោក បង្ហាញវត្តជាមួយអ្នក ឧកញ៉ ឡេង ណាវ៉ាត់ត្រា ក្នុងមុខជំនួញដីឡូត៍ នឹងអចលទ្រព្យ ។ ខាងក្រោមនេះគឺជាប្រវិត្តខ្លះៗរបស់ ឧកញ៉ា ខេមរៈសេរីមន្ត ឈ្មោះកំណើត ខែម ប៊ុនថៃ កើតថ្ងៃទី (៣ វិច្ឆិកា ១៩៨៥) លោកគឺជា អ្នកចម្រៀង ជាតួសម្ដែង និងជារដ្ឋទូតសុច្ឆន្ទៈម៉ាកយីហោល្បី (Brand Ambassdor) លោកត្រូវបានគេស្គាល់ថាជាចៅក្រមនិងជាសមាជិកគណៈកម្មាធិការដែលជាអ្នកវាយតម្លៃ សម្រាប់ភាពពិតដែលបង្ហាញពីកម្មវិធី Jugde Audition ក្នុងកម្មវិធី “X Factor Cambodia”. ។ លោកមានទីកន្លែងកំណើតនៅក្នុងខេត្ត កំពង់ចាម ។ មានឪពុកឈ្មោះ ថា ស៊ីថុន និងម្តាយឈ្មោះ សំ រាប ។ លោក សិរីមន្ត មានបងប្អូន៦នាក់ ប្អូនស្រីពៅឈ្មោះ ខេមរៈ ស្រីពៅ ជាអ្នកចម្រៀង(ស្លាប់) ។ បងប្រុសឈ្មោះ ខេមរៈ ភារុណ ជាអ្នកនិពន្ធទំនុកច្រៀង ។ ប្រពន្ធឈ្មោះ ផល្លី ជាម្ចាស់ផលិតផលទឹកអប់ផ្ទាល់ខ្លួនម៉ាកយីហោ Or Brand នាំចូលពីប្រទេសបារាំង។ លោក សិរីមន្ត មានកូន៣នាក់ប្រុសម្នាក់ស្រី២នាក់ កូនប្រុសបងឈ្មោះ ខេមរៈ មន្តស្នេហ៍ កូនស្រីទី២ឈ្មោះ ខេមរៈ ស្ត្រី កូនស្រីទី៣ឈ្មោះ ខេមរៈ មន្តរាជនី ។ នៅឆ្នាំ ១៩៩៩ លោក ខេមរៈសិរីមន្ត បានចូលរួមកម្មវិធីប្រឡងចម្រៀងក្នុងស្រុកដែលទទួលបានជ័យលាភីលេខ ១ នៅកម្មវិធីប្រលងចម្រៀង (Nestle-Cambodia) ក្នុងទូរទស្សន៍អប្សរាប៉ុស្ត៍លេខ១១ ។ ក្រោយមកលោកខេមរៈសិរីមន្តត្រូវបានជ្រើសរើសអោយច្រៀងនៅផលិតកម្ម (U2 Entertantment) ក្នុងឆ្នាំ ២០០៣ ពេលនោះហើយដែលលោកទទួលបានភាពជោគជ័យក្នុងបទចម្រៀង “បេះដូងអ្នកប្រដាល់” ដែលបទនេះ ទទួលបានការគាំទ្រច្រើននិងមានមនុស្សជាច្រើនចាប់ផ្ដើមស្គាល់លោក ខេមរៈសិរីមន្ត នាពេលនោះដែរ ។ការផ្ដើមបទចម្រៀងក្នុងផលិតកម្ម U2 Entertantment ២០០៣-២០០៧ ការចូលរួមក្នុងផលិតកម្ម Sunday Production ២០០៨-២០១៦ ការចូលរួមក្នុងផលិតកម្មរស្មីហង្សមាស ២០១៧ដល់បច្ចុប្បន្ន៕
ដោយ ៖ វឌ្ឍនា
