សារព័ត៌មាន នគរវត្ត តែងតែនាំមុខគេជានិច្ច
យោងតាមរបាយការណ៍ដែលចេញផ្សាយដោយវិទ្យាស្ថាន Ifo របស់ប្រទេសអាល្លឺម៉ង់កាលពីថ្ងៃព្រហស្បតិ៍បានបង្ហាញថា អំពើហិង្សារបស់អ្នកគាំទ្រទាក់ទងនឹងការប្រកួតបាល់ទាត់អាជីពនៅក្នុងប្រទេសអាល្លឺម៉ង់នាំឱ្យការចំណាយប្រាក់ជិត៤៤លានអឺរ៉ូ (៥០លានដុល្លារអាមេរិក) ជារៀងរាល់ឆ្នាំ។
ការសិក្សានេះបានមើលទិន្នន័យពីប្រទេសអាល្លឺម៉ង់ពីខែមករា ឆ្នាំ២០១១ដល់ខែឧសភា ឆ្នាំ២០១៥ដែលអំពើហិង្សារបស់អ្នកគាំទ្របានបញ្ចប់ការធ្វើឱ្យប៉ូលិសអាល្លឺម៉ង់ ការិយាល័យអយ្យការសាធារណៈ និងតុលាការខាតបង់សរុបចំនួន១៩៤លានអឺរ៉ូ។
របាយការណ៍បានបន្ថែមថា ករណីនៃអំពើហិង្សាបានកើនឡើងគួរឱ្យកត់សម្គាល់នៅក្នុងទីក្រុង នៅពេលដែលពួកគេរៀបចំការប្រកួតបាល់ទាត់អាជីព ដោយមានការប៉ាន់ស្មានថា មានការវាយប្រហារទាក់ទងនឹងបាល់ទាត់ចំនួន៣៨,២៦៨ករណីបានកើតឡើងក្នុងរយៈពេលដែលបានសិក្សា។ ការកើនឡើងនៃអំពើហិង្សាត្រូវបានរកឃើញថា មានអត្រាខ្ពស់ជាពិសេសនៅថ្ងៃប្រកួតដែលមានការប្រកួតក្នុងស្រុក។
លោក Helmut Rainer នាយកមជ្ឈមណ្ឌល Ifo សម្រាប់ការងារ និងសេដ្ឋកិច្ចប្រជាសាស្រ្តបាននិយាយថា “ការប្រកួតបាល់ទាត់ផ្នែកទី១ដល់ទី៣នៅក្នុងប្រទេសអាល្លឺម៉ង់នាំឱ្យមានអំពើហិង្សា២១.៥ភាគរយច្រើនជាងការរំពឹងទុកនៅថ្ងៃទាំងនោះនៃសប្តាហ៍”។
លោកបន្តថា “ជនរងគ្រោះភាគច្រើនជាបុរសវ័យក្មេងដែលមានអាយុចន្លោះពី១៨ទៅ២៩ឆ្នាំ ប៉ុន្តែស្ទើរតែ១ភាគ៥នៃអំពើហិង្សាបន្ថែមនៅថ្ងៃប្រកួតអាចត្រូវបានពន្យល់ដោយការវាយប្រហារលើមន្រ្តីប៉ូលីស។ វាមិនមែនជាព្រឹត្តិការណ៍កំឡុងពេលប្រកួត ឬលទ្ធផលនៃការប្រកួតដែលជាកត្តាជំរុញនោះទេ ប៉ុន្តែជាបំណងប្រាថ្នាចង់ត្រូវបានគេទទួលស្គាល់ថា ជាសមាជិកនៃក្រុមអ្នកគាំទ្រ”។
ទិន្នន័យនៃអំពើហិង្សាដែលបានចុះបញ្ជីត្រូវបានដកចេញពីស្ថិតិឧក្រិដ្ឋកម្មដែលចេញផ្សាយដោយប៉ូលីសនៅក្នុងប្រទេសអាល្លឺម៉ង់។ ការប្រកួតលីគកំពូលអាល្លឺម៉ង់នឹងចាប់ផ្តើមប្រកួតនៅថ្ងៃនេះបន្តទៀតដោយថ្ងៃទី១៨ កុម្ភៈនេះមាន១គូ និងថ្ងៃសៅរ៍មាន៥គូ ៕
ដោយ៖ ភារៈ(រូបភាព ៖ Reuters/CNA)
