សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២២ ខែកុម្ភៈ ឆ្នាំ២០២២នេះ បានអំពាវនាវដល់ឱសថស្ថាន កន្លែងលក់ថ្នាំទាំងអស់ សូមកុំដំឡើងថ្លៃថ្នាំព្យាបាលជំងឺកូវីដ១៩ តាមចិត្ត ដើម្បីជួយឲ្យបងប្អូនប្រជាពលរដ្ឋដែលឆ្លងជំងឺកូវីដ១៩ ងាយទិញសម្រាប់ព្យាបាល។ ការអំពាវនាវរបស់សម្តេចតេជោ ហ៊ុន សែន ក្នុងឱកាសអញ្ជើញបើកការដ្ឋានសាងសង់ ស្ថានីយប្រព្រឹត្តកម្មទឹកកខ្វក់បឹងជើងឯក ក្នុងខណ្ឌមានជ័យ រាជធានីភ្នំពេញខណៈដែល ការឆ្លងរាលដាលជំងឺកូវីដ១៩ បំប្លែងថ្មី អូមីក្រុង បានកើនឡើងច្រើនរយៈពេលចុងក្រោយនេះ និងបានធ្វេីឱ្យប្រជាពលរដ្ឋនាំគ្នាសម្រុកទៅទិញថ្នាំ ទុកសម្រាប់ព្យាបាលនៅតាមផ្ទះរៀងៗខ្លួន។
នាឱកាសនោះដែរ សម្តេចតេជោ ហ៊ុន សែន ក៏បានណែនាំដល់ក្រសួងសុខាភិបាល ដែលមានកាតព្វកិច្ចក្នុងការត្រួតពិនិត្យថ្នាំព្យាបាលកូវីដ១៩ ត្រូវពង្រឹងការត្រួតពិនិត្យជៀសវាងប្រជាពលរដ្ឋទិញប៉ះថ្នាំក្លែងក្លាយ ដែលប៉ះពាល់ដល់សុខភាព និងខាតបង់ថវិកា។
ជាក់ស្ដែងសម្តេចតេជោប្រមុខរាជរដ្ឋាភិបាល បានថ្លែងយ៉ាងដូច្នេះថា៖ “ខ្ញុំសូមអំពាវនាវចំពោះអ្នកលក់ថ្នាំទាំងឡើយ យើងត្រូវបង្កើតសមត្ថភាពនៃការផ្គត់ផ្គង់ថ្នាំបន្ថែមទៀត ប៉ុន្តែសូមឲ្យយកចិត្តទុកដាក់ ទៅលើចំណុច២យ៉ាង អំពីថ្នាំព្យាបាលនោះទី១ តម្លៃថ្នាំកុំបង្កើនទៅតាមចិត្តចង់ ព្រោះឥឡូវឃើញបន្តកន្ទុយគ្នាទៅទិញថ្នាំ ព្រោះប្រជាពលរដ្ឋគាត់មានសមត្ថភាពដើម្បីការពារខ្លួនឯង។ សូមឲ្យកន្លែងលក់ថ្នាំទាំងអស់ ដែលទទួលបានការអនុញ្ញាតសុំកុំដំឡើងថ្លៃទៅតាមចិត្តចង់។ ទី២ ផ្នែកសុខាភិបាលត្រូវតែពិនិត្យមើលថាតើថ្នាំនោះសុទ្ធ ឬមិនសុទ្ធ ព្រោះថ្នាំក្លែងក្លាយ កើតឡើងច្រើនណាស់”។
សូមជម្រាបថា បន្ទាប់ពីមានការឆ្លងជំងឺកូវីដ-១៩ ប្រភេទបំប្លែងថ្មី (អូមីក្រុង) កក្រើកឡើងវិញមួយរយៈពេលចុងក្រោយនេះ ប្រជាពលរដ្ឋបានសម្រុកនាំចេញគ្នាស្វែងរកទិញថ្នាំព្យាបាលជំងឺកូវីដ១៩ ពិសេសឱសថ Molnupiravir។ ឱសថដែលក្រសួងសុខាភិបាលអនុញ្ញាតនេះ មានលក់នៅទីស្តីការក្រសួងប្រៃសណីយ៍ និងទូរគមនាគមន៍ និងនៅតាមប្រៃសណីយ៍នានាតាមបណ្តាខេត្ត រួមទាំងនៅតាមឱសថស្ថានផងដែរ។ នៅក្រសួងប្រៃសណីយ៍ឱសថ Molnupiravir លក់ក្នុងតម្លៃ៥៥ដុល្លារក្នុង១ដូស ស្មើនឹងមួយកំប៉ុងមាន៤០គ្រាប់។ តែបើតាមឱសថស្ថានឯកជន តម្លៃចាប់ពីជាង៦០ដុល្លារ ដល់ជិត១០០ដុល្លារ បើតាមការបញ្ជាក់របស់ប្រជាពលរដ្ឋទិញថ្នាំនេះ។
ដោយឡែកជុំវិញករណីនេះដែរ ក្រសួងសុខាភិបាល កាលពីថ្ងៃទី២១ ខែកុម្ភៈ ឆ្នាំ២០២២ម្សិលមិញនេះ បានចេញសេចក្តីជូនដំណឹង ដោយភ្ជាប់ជាមួយរូបភាពថ្នាំ Molnupiravir ដែលគ្មានលេខបញ្ជិកាពីក្រសួងសុខាភិបាល ដោយប្រកាសហាមឃាត់ការចែកចាយ និងលក់ថ្នាំ Molnupiravir ដោយគ្មានការទទួលស្គាល់ត្រឹមត្រូវទាំងនោះផងដែរ។
គួរបញ្ជាក់ថា នៅព្រឹកថ្ងៃអង្គារទី២២ ខែកុម្ភៈ ឆ្នាំ២០២២នេះ បើយោងតាមសេចក្ដីជូនដំណឹងរបស់ក្រសួងសុខាភិបាលកម្ពុជា បានបញ្ជាក់ពីការរកឃើញករណីវិជ្ជមានវីរុសកូវីដ-១៩ថ្មីចំនួន ៥៩៨នាក់(PCR) ( អូមីក្រុងទាំងអស់) ខណៈឣ្នកជាសះស្បើយចំនួន ៣៥៨នាក់ និងករណីស្លាប់ ២នាក់។ ក្នុងនោះ៖ ករណីឆ្លងសហគមន៍ ៥៧២នាក់ និងអ្នកដំណើរពីបរទេស ២៦នាក់។
បេីគិតត្រឹមព្រឹក ថ្ងៃទី២២ ខែកុម្ភៈ ឆ្នាំ២០២២នេះ កម្ពុជា៖ អ្នកឆ្លងសរុបចំនួន 127,575 នាក់ , អ្នកជាសះស្បើយសរុបចំនួន 121,125 នាក់ និង អ្នកស្លាប់សរុបចំនួន 3,022 នាក់៕
ដោយ៖ស តារា
