សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង ៖ គ្រោះថ្នាក់ចរាចរណ៍រវាងម៉ូតូនឹងម៉ូតូបុកគ្នាយ៉ាងពេញទំហឹង បណ្តាលឱ្យមនុស្ស២នាក់ស្លាប់ និងម្នាក់ទៀតរងរបួសធ្ងន់។ ហេតុការណ៍នេះបានកើតឡើងកាលពីវេលាម៉ោង១៩ៈ០០នាទី ថ្ងៃពុធ ១៤រោច ខែមាឃ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី០២ ខែមីនា ឆ្នាំ២០២២ នៅចំណុចបង្គោលលេខ០៣៤ ផ្លូវក្រួសក្រហមក្រវាត់ព្រំដែន ស្ថិតក្នុងភូមិឫទ្ធីសែនជ័យ១ ឃុំអូរស្វាយស្រុកបុរីអូរស្វាយសែនជ័យ ខេត្តស្ទឹងត្រែង។
បើយោងតាមរបាយការណ៍របស់អធិការដ្ឋាននគរបាលស្រុកបុរីអូរស្វាយសែនជ័យបានឱ្យដឹងថា មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូហុងដាឌ្រីម ពណ៌ខ្មៅ ពាក់ស្លាកលេខភ្នំពេញ1AP-4192 ជាមួយនឹងម៉ូតូវ៉េវ ពណ៌ខ្មៅលាយក្រហម គ្មានស្លាកលេខដែលជិះទិសបញ្ច្រាសគ្នា បណ្ដាលឱ្យរបួសធ្ងន់០១នាក់ និងស្លាប់០២នាក់។
ចំណែកភាគីម្ចាស់ម៉ូតូម៉ាកហុងដាឌ្រីម ពណ៌ខ្មៅមានឈ្មោះ កែវ ប៉ង ភេទប្រុស អាយុ២២ឆ្នាំ មានស្រុកកំណើតនៅភូមិកោះល្ង ឃុំព្រះរំកិល ស្រុកបុរីអូរស្វាយសែនជ័យ បច្ចុប្បន្នស្នាក់នៅភូមិឃុំកើតហេតុខាងលើ បានស្លាប់នៅមន្ទីរសម្រាកព្យាបាលឯកជនត្រង់ផ្លូវបំបែកដុងក្រឡ ក្នុងភូមិឃុំកើតហេតុខាងលើ គាត់បានបុកអ្នកជិះម៉ូតូម៉ាកវ៉េវ ពណ៌ខ្មៅលាយក្រហមដែលមានឈ្មោះម៉ាន ម៉ុន ភេទប្រុស អាយុ៥៥ឆ្នាំ (ជិះពីក្រោយ)មាន ស្រុកកំណើតនៅភូមិល្អក់ ឃុំកំពង់ថ្ម ស្រុកសន្ទុក ខេត្តកំពង់ធំ និងមានទីលំនៅសព្វថ្ងៃភូមិឃុំកើតហេតុខាងលើបានស្លាប់នៅមន្ទីរសម្រាកព្យាបាលឯកជនផ្លូវបំបែកដុងក្រឡ និងម្នាក់ទៀតដែលជាអ្នកបើកបរឈ្មោះ ម៉ន ម៉ាប់ អាយុ៣៩ឆ្នាំភេទប្រុស បណ្ដាលឱ្យរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។
ចំពោះមូលហេតុដែលបង្កឱ្យមានគ្រោះថ្នាក់ចរាចរណ៍នេះដោយសារតែអ្នកបើកបរម៉តូម៉ាកវ៉េវគ្មានភ្លើងបំភ្លឺ និងមិនប្រកាន់ស្ដាំ រីឯអ្នកបើកបរម៉ូតូម៉ាកហុងដាឌ្រីមខ្វះការប្រុងប្រយ័ត្ន បើកបរក្នុងល្បឿនលឿន។
ក្រោយការពិនិត្យនិងធ្វើកំណត់ហេតុទៅលើសាកសពជនរងគ្រោះរួច សមត្ថកិច្ចនគរបាលបានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីព្រះពុទ្ធសាសនា។ ចំណែកម៉ូតូទាំង២គ្រឿងរបស់ជនរងគ្រោះត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកបុរីអូរស្វាយសែនជ័យ ដើម្បីដោះស្រាយនៅពេលក្រោយ៕
ដោយ៖ មាស សុផាត
