សមត្ថកិច្ចកម្ពុជា-ថៃ៖ ឯកភាពគ្នាធ្វើរបងហ៊ុមព័ទ្ធ ជុំវិញបង្គោលជំហរ ដែលបម្រើឱ្យបង្គោលព្រំដែនលេខ៤២ នៅស្រុកស្វាយចេក

ចែករំលែក៖

ខេត្តបន្ទាយមានជ័យ៖ បេីតាមការបញ្ជាក់ពីមន្ត្រីនគរបាលវរសេនាតូចការពារព្រំដែនលេខ៩១១ ប៉ោយប៉ែត-ស្វាយចេក បានឱ្យដឹងនៅព្រឹកថ្ងៃសុក្រទី១៨ ខែមីនា ឆ្នាំ២០២២នេះថា៖ ដើម្បីកុំឱ្យប្រែប្រួល ឬបាត់បង់និយាមកា ដោយប្រការណាមួយ ភាគទាហាន និងនគរបាលព្រំដែន កម្ពុជា-ថៃ បានឯកភាពគ្នាធ្វើរបងហ៊ុមព័ទ្ធ ជុំវិញបង្គោលជំហរ របស់កម្ពុជា ដែលបម្រើឱ្យបង្គោលព្រំដែនលេខ៤២ ស្ថិតនៅនិយាមកា WGS84 (257427-1531984) នៅស្រុកស្វាយចេក។

នគរបាលការពារព្រំដែនលេខ៩១១ បានឱ្យដឹងទៀតថា កម្លាំងប៉ុស្តិ៍ថ្នល់បត់ រួមជាមួយយោធា នៃកងការពារព្រំដែន ៥០៣ ដឹកនាំដោយលោកវរសេនីយ៍ អ៊ិន ថុល មេបញ្ជាការ (គ២) និងក្រុមការងារ ទំនាក់ទំនងព្រំដែន ប្រចាំបឹងត្រកួន បានដឹកនាំដោយលោក វរសេនីយ៍ត្រី ព្រឹម ជុន ជំនួយការ បានរួមកិច្ចសហប្រតិបត្តិការទ្វេភាគី ជាមួយទាហានឈុតខ្មៅថៃ កងអនុសេនាធំលេខ១២០៤ ដឹកនាំដោយលោកព្រិន្ទបាល ណារ៉ាត់ឆៈតិគុណឋានៈកាន មេបញ្ជាការរង កាលពីថ្ងៃទី១៧ ខែមីនា បានចុះធ្វើរបងហ៊ុមព័ទ្ធជុំវិញបង្គោលជំហរ របស់កម្ពុជា ដែលបម្រើឲ្យបង្គោលព្រំដែន លេខ៤២ ដើម្បីកុំឲ្យមានការប្រែប្រួល ឬបាត់បង់និយាមកា WGS84 (257427-1531984) នៅមុខភូមិសាស្ត្រ ភូមិល្បើកស្វាយ ឃុំ-ស្រុកស្វាយចេក (ខាងកម្ពុជា) ទល់មុខនឹងភូមិណងយ៉ាកែវ ឃុំ-ស្រុកគោកស៊ូង (ខាងថៃ)។

សូមជម្រាបថា កាលពីពេលថ្មីៗនេះ ពលករខ្មែរជិត៥០០០នាក់ ត្រូវបានភាគីថៃបញ្ជូនមកឱ្យកម្ពុជាវិញតាមច្រករបៀង កិច្ចព្រមព្រៀង (ច្រករបៀងអូរបីជាន់ ក្នុងស្រុកអូរជ្រៅ), ច្រកតំបន់(ម៉ាឡៃ និងបឹងត្រកួន) និងអន្តរជាតិប៉ោយប៉ែត ស្ថិតក្នុងខេត្តបន្ទាយមានជ័យ ។ នេះបើតាមកាឲ្យដឹងពីមន្ត្រីជំនាញផ្នែកទទួលពលករបញ្ជូនពីថៃ។

ជាក់ស្ដែងពលករជិត៥០០០នាក់នេះ គេបញ្ជូនពីថៃចាប់ពីថ្ងៃទី៧ ដល់ថ្ងៃទី១៥ មីនា ២០២២ ដោយកាលពីថ្ងៃទី៧ មីនា ពលករបញ្ជូនពីថៃមានចំនួន៦២៨នាក់ (ស្រី២៥៧នាក់ កុមា៧១នាក់) ។ ថ្ងៃទី៨ មីនា (ចំនួន៥៥៣នាក់ស្រី២១៦នាក់កុមា៨០នាក់) ។ ថ្ងៃទី៩ មីនា ចំនួន៥៩០នាក់ (ស្រី២៣០នាក់ កុមា៨៥នាក់) ។ ថ្ងៃទី១០ មីនា ចំនួន៤៩០នាក់ (ស្រី១៩៩នាក់កុមា៧៩នាក់) ថ្ងៃទី១១ មីនា (ចំនួន៦០១នាក់ ស្រី២៤៦នាក់ កុមា៦៥នាក់) ។ ថ្ងៃទី១២ មីនា (ចំនួន៣៥២នាក់ស្រី១៤៤នាក់កុមា៥២នាក់) ។ ថ្ងៃទី១៣ មីនា (ចំនួន៥១០នាក់ ស្រី២១៣នាក់ កុមា៦៨នាក់) ។ ថ្ងៃទី១៤ មីនា (ចំនួន៥០៧នាក់ស្រី២១០នាក់ កុមា៦១នាក់) និងថ្ងៃទី១៥ មីនា (ចំនួន៤៨៩នាក់ ស្រី២០៣នាក់កុមាចំនួន៤០នាក់)។

បេីយោងតាមការសាកសួរពីមន្ត្រីជំនាញ ក៏បានបញ្ជាក់ដែរថា ពលករទាំងនេះស្ម័គ្រចិត្តវិលត្រឡប់មកផ្ទះដោយខ្លួនឯង ដើម្បីចូលរួមពិធីបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ! ព្រោះតែពួកគេខកខានមិនបានវិលត្រឡប់មកស្រុកជាង២ឆ្នាំមកហើយ លើទឹកដីថៃ ដោយសារតែជំងឺកូវីដ-១៩ បានរាលដាលខ្លាំង៕