សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅគ្រាដែលពិធីបុណ្យចូលឆ្នាំថ្មីជិតចូលមកដល់នោះចរន្តភ្ញៀវទេសចរផ្ទៃក្នុងនាចុងសប្តាហ៍ ថ្ងៃទី៩-១០ ខែមេសា ឆ្នាំ២០២២ មានសន្ទុះកើនឡើងខ្លាំងធៀបនឹងសប្តាហ៍កន្លងមក ជាមួយនឹងចំនួនជិត៤០ម៉ឺននាក់ កើនឡើនដល់ទៅជាង៧៤%។ នេះបើតាមលោក ថោង ខុន រដ្ឋមន្ត្រីក្រសួងទេសចរណ៍។
ចំពេលដែលប្រមុខរាជរដ្ឋាភិបាលប្រកាសលើកលែងការពាក់ម៉ាសនៅខេត្តឦសាននិងខេត្តព្រះវិហារ,ស្ទឹងត្រែងនោះគេរំពឹងថាចំនួនភ្ញៀវទេសចរនឹងកើនឡើងខ្លាំងនៅបណ្ដាខេត្តទាំងនេះក្នុងឱកាសបុណ្យចូលឆ្នាំប្រពៃណីជាតិ។ សម្ដេចហ៊ុនសែនបានប្រកាសលើកលែងការពាក់ម៉ាសនៅខេត្តព្រះវិហារ,ស្ទឹងត្រែង,រតនគិរីនិងមណ្ឌលគិរី ដែលជាផ្នែកមួយនៃការជម្រុញល្បឿនវិស័យទេសចរណ៍ហើយមានសកម្មភាពខ្លាំងក្លាឡើងវិញ។
ភ្ញៀវទេសចរក្នុងស្រុកចាប់ផ្ដើមធ្វើដំណើរជាបន្តបន្ទាប់តាំងពីចុងសប្តាហ៍រហូតដល់ពេលនេះ។ លោករដ្ឋមន្ត្រី ថោង ខុន បានបញ្ជាក់ថា ភ្ញៀវទេសចរសរុបមានចំនួន ៣៧០.៧៥៨នាក់ ក្នុងនោះភ្ញៀវជាតិ ៣៥៦.៥៤០នាក់ និងភ្ញៀវបរទេសផ្ទៃក្នុង ១៤.២១៨នាក់។
គោលដៅទេសចរណ៍សំខាន់ៗ រួមមាន៖
* រាជធានីភ្នំពេញ ១០៩,៨៣៧នាក់
* ខេត្តសៀមរាប ៤៣,៨៨៧នាក់
* ខេត្តព្រះសីហនុ ៣៥,៨៣៦នាក់
* ខេត្តកំពត ៣៣,៥៦៧នាក់
* ខេត្តពោធិ៍សាត់ ៣២,៩០៧នាក់
* ខេត្តបាត់ដំបង ២៦,៨២៩នាក់
* ខេត្តកែប ២៤,១៩០នាក់។
ចរន្តភ្ញៀវក្នុងចុងសប្តាហ៍នេះ មានសន្ទុះកើនឡើងខ្លាំងធៀបនឹងសប្តាហ៍កន្លងមក។ ជាក់ស្តែង តួលេខខាងលើមានការកើនឡើងប្រមាណ ៧៤.១៩% ធៀបនឹងចុងសប្តាហ៍មុន។
ប្រជាពលរដ្ឋមួយចំនួនបានចាប់ផ្តើមធ្វើដំណើរចេញពីរាជធានីភ្នំពេញទៅកាន់ស្រុកកំណើតជាបណ្តើរៗនាថ្ងៃសៅរ៍ និងអាទិត្យចុងសប្តាហ៍នេះ។ ការធ្វើដំណើរចាកចេញពីរាជធានីភ្នំពេញបាននិងកំពុងមានសកម្ម ភាពជាបណ្ដើរៗដោយរថយន្តដឹកជញ្ជូនអ្នកដំណើរធ្វើដំណើរទាំងយប់ក៏មាន។ កម្មករ_កម្មការិនីដែលចប់ម៉ោងការងារបានចាកចេញពីរាជធានីភ្នំពេញសំដៅទៅស្រុកកំណើត។
បណ្តារាជធានី-ខេត្តបានត្រៀមរួចរាល់ស្ទើរ១០០% ក្នុងការរៀបចំព្រឹត្តិការណ៍សង្រ្កាន្តចូលឆ្នាំ និងកម្សាន្តសប្បាយនាពិធីបុណ្យចូលឆ្នាំប្រពៃណីជាតិខាងមុខ។ ដោយឡែកនៅរាជធានីភ្នំពេញ ក្រសួងទេសចរណ៍សហការជាមួយសាលារាជធានីភ្នំពេញ និងគណៈកម្មា ធិការជាតិអូឡាំពិកកម្ពុជា បានរៀបចំព្រឹត្តិការណ៍ពិព័រណ៌វប្បធម៌ ទេសចរណ៍ និងកីឡា ដែលបានប្រព្រឹត្តទៅនាបរិវេណពហុកីឡដ្ឋានជាតិមរតកតេជោ ចាប់ពីថ្ងៃទី៦-១០ ខែមេសា ឆ្នាំ២០២២ ដែលបានទាក់ទាញភ្ញៀវទេសចរ និងប្រជាពលរដ្ឋឲ្យទៅកម្សាន្តសប្បាយជាច្រើនកុះករផងដែរ។ ប្រជាពលរដ្ឋ សប្បាយរីករាយពេញចិត្តនឹងកម្មវិធី និងទីតាំងរៀបចំនៅ ពហុកីឡដ្ឋានជាតិមរតកតេជោនេះ ដែលក្នុងមួយថ្ងៃៗមាន ទេសចរ និងប្រជាពលរដ្ឋមិនតិចជាង១មុឺននាក់ទៅចូលរួមកម្សាន្តសប្បាយ។
ដោយឡែក ក្នុងសប្តាហ៍នេះនៅតាមបណ្តាវត្តអារាម សាលារៀន គ្រឹះស្ថានសិក្សា ស្ថាប័ន អង្គភាពឯកជននិងរោងចក្រមមួយចំនួនបានរៀបចំជាកម្មវិធីកម្សាន្តសប្បាយសម្រាប់បុគ្គលិក និងនិយោជិក ក៏ដូចជាប្រារព្វកម្មវិធីសង្រ្កាន្តជាលក្ខណៈដាច់ដោយឡែកទៅតាមអង្គភាព និងស្ថាប័នរបស់ខ្លួន។
ក្រសួងទេសចរណ៍បានបន្តណែនាំឲ្យមន្ទីរទេសចរណ៍ខិតខំបន្តអនុវត្តសារាចរណែនាំសម្រាប់ពិធីបុណ្យចូលឆ្នាំប្រពៃណីជាតិ ដោយត្រូវពង្រឹងកិច្ចសហការជាមួយរដ្ឋបាលរាជធានី-ខេត្ត និងមន្ទីរជំនាញពាក់ព័ន្ធក្នុងការគ្រប់គ្រងចរន្តភ្ញៀវទេសចរ ការពង្រឹងការអនុវត្តវិធានការទប់ស្កាត់ជំងឺកូវីដ-១៩ រួមជាមួយការពង្រឹងគុណភាពផលិតផល និងសេវាកម្មទេសចរណ៍ជាដើម៕
ដោយ៖ សូរិយា
