ភ្លៀងលាយឡំខ្យល់កន្ត្រាក់បក់បោកខ្លាំងធ្វើឱ្យដើមក្ងោកមួយដើមធំបាក់សង្កត់រថយន្តមួយគ្រឿងរងការខូចខាត

ភ្នំពេញ៖ ខណៈមេឃកំពុងភ្លៀងយ៉ាងខ្លាំងលាយឡំនឹងខ្យល់កន្ត្រាក់ផងបណ្ដាលឱ្យបាក់ដើមក្ងោក១ដើមធំសង្កត់លើរថយន្តមួយគ្រឿង តែសំណាងល្អមិនបណ្ដាលឱ្យមានមនុស្សរងរបួសឡើយ។ ហេតុការណ៍នេះបានកើតឡើងនៅវេលាម៉ោង៣និង១០នាទីរសៀលថ្ងៃទី០៩ ខែឧសភា ឆ្នាំ២០២២ នៅចំណុចក្បែរភ្លើងស្តុបទេពផន តាមបណ្ដោយមហាវិថីម៉ៅសេទុង ក្នុងសង្កាត់ផ្សារដេប៉ូទី១ ខណ្ឌទួលគោក។

    ប្រភពព័ត៌មានបានឱ្យដឹងថា រថយន្តដែលរងការខូចខាតម៉ាក Range Rover ពណ៌ស ពាក់ស្លាកលេខ ភ្នំពេញ2AE-7979 បានចតនៅប្របចិញ្ជើមមហាវិថីម៉ៅសេទុង ស្រាប់តែមានភ្លៀងធ្លាក់និងខ្យល់កន្រ្តាក់បណ្ដាលឱ្យបាក់ដើមក្ងោក១ដើមដ៏ធំសង្កត់លើរថយន្តតែម្ដង ធ្វើឱ្យខូចខាតមួយកំណាត់ក្រោយ តែសំណាងល្អមិនបណ្ដាលឱ្យមានមនុស្សរងរបួសឡើយ។

ក្រោយពេលកើតហេតុកម្លាំងអាជ្ញាធរមូលដ្ឋានបានចុះដល់ទីតាំងកើតហេតុដើម្បីសម្រួលចរាចរណ៍ជៀសចាងការកកស្ទះ និងចាត់ចែងកាត់ដើមឈើដែលបាក់ចេញពីកណ្ដាលផ្លូវ៕

ដោយ ៖  រ៉ារ៉ា