សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ នគរបាលក្រុងក្រចេះបានស្រាវជ្រាវតាមចាប់ឃាត់ខ្លួនយុវជន២នាក់ ពាក់ព័ន្ធករណីប្រើហិង្សាដោយចេតនា ខណៈដែលពួកគេទាំងពីរនាក់ប្រដាប់ដោយដាវ២ដើមបានធ្វើសកម្មភាពដេញកាប់យុវជនមួយក្រុមទៀតរត់ប្រសាចបាតជើងសព្រាត ផ្អើលនៅមុខសាលាខេត្តក្រចេះ ប្រៀបដូចឈុតឆាកថតកុន កាលពីល្ងាចថ្ងៃទី០៥ ខែកក្កដា ។ តែមិនបង្កឱ្យមានគ្រោះថ្នាក់នោះទេ ដោយជនរងគ្រោះបានរត់គេចទាន់។ នេះបើយោងតាមការបញ្ជាក់ឱ្យដឹងពីផេកស្នងការដ្ឋាននគរបាលខេត្តក្រចេះ នៅថ្ងៃទី៦ ខែកក្កដា ឆ្នាំ២០២២នេះ។
សមត្ថកិច្ចនគរបាលខេត្តបានបន្តថា ជនទាំងពីរនាក់ដែលត្រូវបាននគរបាលព្រហ្មទណ្ឌក្រុងក្រចេះចុះទៅចាប់ខ្លួនបានភ្លាមៗនោះមាន៖
១-ឈ្មោះ ស៊ឹង គឹមសាន អាយុ២៣ឆ្នាំ មានទីលំនៅភូមិទី២ សង្កាត់រកាកណ្តាល ក្រុងក្រចេះ។
២-ឈ្មោះ រឿន បូរី អាយុ២០ឆ្នាំ មានទីលំនៅភូមិបុសលាវលេី ឃុំបុសលាវ ស្រុកចិត្របុរី។
សមត្ថកិច្ចស្នងការដ្ឋាននគរបាលខេត្តក្រចេះបានបន្តថា បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការតាមនីតិវិធី៕
ដោយ ៖ សិលា
