Ben Davies ចេញពី Liverpool ទៅ Rangers ខណៈ Branthwaite របស់ Everton ទៅ PSV Eindhoven ក្នុងលក្ខខណ្ឌខ្ចីជើង

ចែករំលែក៖

ក្លិប Rangers បានយល់ព្រមលើកិច្ចព្រមព្រៀងក្នុងតម្លៃ៤លានផោនដើម្បីចុះហត្ថលេខាលើខ្សែការពារ Ben Davies ពីក្លិបហង្សក្រហមLiverpool។ ការផ្លាស់ប្តូរសម្រាប់កីឡាករវ័យ២៦ឆ្នាំរូបនេះនឹងមានតម្លៃថ្លៃដើមត្រឹមតែជាង៣លានផោន និងជិត១លានផោននៅក្នុងការបន្ថែមដែលទាក់ទងនឹងការបង្ហាញខ្លួន និងការសម្តែងរបស់ក្រុម។

Davies បានចូលរួមជាមួយ Liverpool ពីក្រុម Preston ក្នុងតម្លៃដំបូង៥០០,០០០ផោនក្នុងខែកុម្ភៈ ឆ្នាំ២០២១ នៅពេលដែលក្លិបកំពុងជួបវិបត្តិរបួសនៅតំបន់កណ្តាល។ គាត់មិនបានបង្ហាញខ្លួនជាក្រុមដំបូងសម្រាប់ក្រុមហង្សក្រហម ហើយបានចំណាយពេលកាលពីរដូវកាលមុនក្នុងលក្ខខណ្ឌខ្ចីជើងនៅ Sheffield United។

ក្លិប Blackburn និង Middlesbrough ក៏ត្រូវបានគេជឿថា មានការចាប់អារម្មណ៍លើ Davies ផងដែរ ខណៈ Burnley និង Stoke មើលទៅលើការខ្ចីជើងពេញមួយរដូវកាលសម្រាប់គាត់។ កិច្ចព្រមព្រៀងសម្រាប់ Davies កើតឡើងបន្ទាប់ពី Rangers បានទទួលយកការផ្តល់ជូនពី Ajax សម្រាប់ Calvin Bassey ដោយខ្សែការពារនីហ្សេរីយ៉ាត្រៀមនឹងផ្ទេរក្នុងតម្លៃលើសពី២០លានផោន។

ចំណែកខ្សែការពារកណ្តាលរបស់ Everton កីឡាករ Jarrad Branthwaite បានចូលរួមជាមួយក្រុមហូឡង់ PSV Eindhoven ក្នុងកិច្ចសន្យាខ្ចីជើងរយៈពេលមួយរដូវកាល។ កីឡាករវ័យ២០ឆ្នាំរូបនេះបានចូលរួម Everton ពីក្លិប Carlisle មកពីអង់គ្លេស League Two ដែលជាក្រុមកំណើតរបស់គាត់ក្នុងខែមករា ឆ្នាំ២០២០។

គាត់បានបង្ហាញខ្លួនក្នុងក្រុមដំបូងចំនួន១៣លើកសម្រាប់ក្រុម Everton ដោយស៊ុតបញ្ចូលទីបាន១គ្រាប់ និងបានចុះហត្ថលេខាលើកិច្ចសន្យាថ្មីនៅក្នុងខែធ្នូដែលរក្សាគាត់នៅក្លិបរហូតដល់ឆ្នាំ២០២៥។

PSV បានបញ្ចប់ក្នុងចំណាត់ថ្នាក់លេខ២តាមពីក្រោយក្រុម Ajax ក្នុងការប្រកួត Eredivisie កាលពីរដូវកាលមុន ហើយមានលក្ខណៈសម្បត្តិគ្រប់គ្រាន់សម្រាប់ការប្រកួតក្របខ័ណ្ឌ Champions League ។

ក្រុមហូឡង់មួយនេះគ្រប់គ្រងដោយអតីតខ្សែប្រយុទ្ធ Manchester United និងហូឡង់លោក Ruud van Nistelrooy ដែលបានចូលកាន់តំណែងជាគ្រូបង្វឹកកាលពីខែមីនា។ នេះជាលើកទី២ហើយដែល Branthwaite ត្រូវបានខ្ចីជើងចាប់តាំងពីបានមកដល់ Goodison Park។កីឡាកររូបនេះក៏ធ្លាប់លេងនៅក្លិប Blackburn Rovers ក្នុងក្របខ័ណ្ឌ Championship អំឡុងពាក់កណ្តាលទីពីរនៃរដូវកាល២០២១-២០២២ផងដែរ ៕