សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជាសន្តិសុខម្នាក់ត្រូវបានសមត្ថកិច្ចឃាត់ខ្លួនយកទៅសួរនាំក្រោយពីគប់កាំបិតតាមផ្លូវប៊ិះទៅត្រូវអ្នកធ្វេីដំណេីរឆ្លងកាត់ បង្កការភ្ញាក់ផ្អេីលកាលពីវេលាម៉ោង១០និង៤០នាទីយប់ ថ្ងៃទី៣០ ខែសីហា ឆ្នាំ២០២២ នៅគល់ស្ពានអាកាស មហាវិថីឈ្នះ=ឈ្នះ ស្ថិតក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។
តាមប្រភពព័ត៌មានពីបុរសម្នាក់បាន និយាយប្រាប់ថា នៅមុនពេលកើតហេតុ រូបគាត់បានធ្វើដំណើរនៅតាមបណ្ដោយ មហាវិថី ឈ្នះ=ឈ្នះ ខណៈមកដល់ចំណុចគល់ស្ពានអាកាសក៏ស្រាប់តែមាន សន្តិសុខម្នាក់កំពុងយាមនៅខាងមុខ ឃ្លាំងមួយកន្លែងបានគប់កាំបិតខ្ទាតមក លើរូបគាត់និងភរិយា តែសំណាងល្អមិនត្រូវ។ភ្លាមនោះ គាត់ក៏បានជិះម៉ូតូ ត្រឡប់ទៅសួរនាំ ហើយសន្តិសុខនោះ បាននិយាយថា ដោយសារតែគាត់មាន បញ្ហាផ្លូវចិត្តបន្តិចបន្តួច ហើយគាត់បាន គប់កាំបិតទៅលើដី តែកាំបិតនោះបានផ្លាតទៅលើផ្លូវ ដោយគ្មានបំណងគប់អ្នកណាម្នាក់នោះទេ។
បន្ទាប់មកសមត្ថកិច្ចបានចុះទៅដល់កន្លែងកេីតហេតុ ហេីយបាននាំសន្តិសុខខាងលើ យកទៅប៉ុស្តិ៍នគរបាលដើម្បីសួរនាំបន្ថែម។
ក្រោយពេលកើតហេតុ ដោយសារភាគីខាងជនរងគ្រោះមិនបានប្តឹងផ្តល់នោះទើបសមត្ថកិច្ចគ្រាន់តែណែនាំសន្តិសុខខាងលើ ហើយក៏ឱ្យត្រឡប់ទៅវិញភ្លាមៗផងដែរ ៕
ដោយ៖សុខាសែនជ័យ
